ന്യൂദല്‍ഹി: റീജ്യണല്‍ റാപ്പിഡ് റെയില്‍ ട്രാന്‍സിറ്റ് സിസ്റ്റം-ആര്‍ആര്‍ടിഎസ്, പദ്ധതിക്ക് ഫണ്ട് നല്കുന്നതില്‍ വീഴ്ച വരുത്തിയ ദല്‍ഹി സര്‍ക്കാരിനെതിരെ രൂക്ഷവിമര്‍ശനവുമായി സുപ്രീംകോടതി. പദ്ധതി വിഹിതം 28നകം അനുവദിക്കണമെന്നും കോടതി ഉത്തരവിട്ടു. ഉത്തരവ് പാലിച്ചില്ലെങ്കില്‍ ദല്‍ഹി സര്‍ക്കാരിന്റെ ഈ വര്‍ഷത്തെ ബജറ്റില്‍ നിന്നുള്ള തുക കണ്ടുകെട്ടുമെന്നും കോടതി അറിയിച്ചു.
415 കോടി രൂപയാണ് ദല്‍ഹി-മീററ്റ് റീജ്യണല്‍ റാപ്പിഡ് ട്രാന്‍സിറ്റ് സിസ്റ്റത്തിനുവേണ്ടി നല്കാന്‍ ബാക്കിയുള്ളത്. ഈ തുക ഒരാഴ്ചയ്‌ക്കകം നല്‍കണമെന്നാണ് കോടതി അറിയിച്ചിരിക്കുന്നത്. ഇതു ചെയ്തില്ലെങ്കില്‍ പരസ്യത്തിനായി ബജറ്റില്‍ നീക്കിവച്ച 550 കോടി രൂപ കണ്ടുകെട്ടുമെന്നാണ് കോടതി വ്യക്തമാക്കിയിരിക്കുന്നത്.
മൂന്ന് വര്‍ഷത്തിനുള്ളില്‍ ദല്‍ഹി സര്‍ക്കാരിന് 1100 കോടി രൂപ പരസ്യങ്ങള്‍ക്കായി ചെലവഴിക്കാന്‍ കഴിയുമെങ്കില്‍, എന്തുകൊണ്ട് അടിസ്ഥാന സൗകര്യ വികസന പദ്ധതികള്‍ക്ക് പണം നല്കാന്‍ കഴിയില്ലെന്നും കോടതി ചോദിച്ചു. ദല്‍ഹി-മീററ്റ് റീജ്യണല്‍ റാപ്പിഡ് ട്രാന്‍സിറ്റ് സിസ്റ്റത്തിന്റെ കുടിശിക തീര്‍ക്കാന്‍ ദല്‍ഹി സര്‍ക്കാരിന് കോടതി ജൂലൈയില്‍ രണ്ട് മാസത്തെ സമയം നല്കിയിരുന്നു. നവംബര്‍ 28നാണ് കേസിന്റെ അടുത്ത വാദം കേള്‍ക്കല്‍.
പ്രതികരിക്കാൻ ഇവിടെ എഴുതുക: