തിരുവനന്തപുരം: ദിലീപ് ചലച്ചിത്രം ‘ബാന്ദ്ര’ക്കെതിരെ നെഗറ്റീവ് റിവ്യൂ നടത്തിയതിന് അശ്വന്ത് കോക്ക് അടക്കം ഏഴു യൂ ട്യൂബര്മാര്ക്കെതിരെ കേസ് എടുക്കണമെന്ന ഹര്ജി കോടതി നേരിട്ട് അന്വേഷിക്കും.
പരാതിക്കാരന്റെ മൊഴിയെടുക്കാന് ഡിസംബര് 16ന് ഹാജരാകാന് കോടതി ഉത്തരവിട്ടു. തിരുവനന്തപുരം അഞ്ചാം ജുഡീഷ്യല് ഫസ്റ്റ് ക്ലാസ് മജിസ്ട്രേട്ട് അശ്വതി നായരുടേതാണുത്തരവ്.
സാക്ഷിമൊഴികളും രേഖകളും വിലയിരുത്തിയുള്ള പ്രാഥമിക അന്വേഷണത്തിന് ശേഷം പ്രഥമദൃഷ്ട്യാ കേസുണ്ടെങ്കില് വ്ളോഗര്മാര്ക്കെതിരെ കോടതി നേരിട്ട് കേസെടുക്കും. പോലീസിനെക്കൊണ്ട് കേസ് രജിസ്റ്റര് ചെയ്യിക്കണമെന്ന ആവശ്യം കോടതി തള്ളി.
അശ്വന്ത് കോക്ക്, ഷിഹാബ്, ഉണ്ണി ബ്ലോഗ്സ്, ഷാസ് മുഹമ്മദ്, അര്ജുന്, ഷിജാസ് ടോക്ക്സ്, സായ് കൃഷ്ണ എന്നീ ഏഴ് യൂടൂബര്മാര്ക്കെതിരെ കേസെടുക്കണമെന്നാവശ്യപ്പെട്ടുള്ളതാണ് ഹര്ജി.
ബാന്ദ്ര സിനിമയുടെ നിര്മാണകമ്പനി അജിത് വിനായക ഫിലിംസാണ് പരാതി സമര്പ്പിച്ചത്. സിനിമ ഇറങ്ങി മൂന്നു ദിവസത്തിനുള്ളില് നിര്മാതാക്കള്ക്ക് നഷ്ടമുണ്ടാക്കുന്ന രീതിയില് നെഗറ്റീവ് റിവ്യൂ നടത്തിയെന്നാണ് ഹര്ജിയിലെ ആരോപണം.
കേസെടുക്കാന് തിരുവനന്തപുരം സിറ്റി പോലീസിന് നിര്ദേശം നല്കണമെന്നാണ് നിര്മാണ കമ്പനിയുടെ ഹര്ജിയിലെ ആവശ്യം. ചിത്രത്തെ അപകീര്ത്തിപ്പെടുത്തുന്ന വിധത്തില് സോഷ്യല് മീഡിയ വഴി വ്യാജവും മോശവും പ്രേക്ഷകരെ തെറ്റിദ്ധരിപ്പിക്കുന്നതുമായ കാര്യങ്ങള് പ്രചരിപ്പിക്കുന്നുവെന്നാണ് ഹര്ജിയിലെ ആരോപണം.
ഇവര് ചെയ്യുന്നത് അപകീര്ത്തിപ്പെടുത്തല് മാത്രമല്ല തങ്ങള്ക്ക് അന്യായ നഷ്ടം സംഭവിപ്പിച്ച് വ്യൂവേഴ്സിന്റെ എണ്ണം അനുസരിച്ച് യൂട്യൂബ് ചാനല് റേറ്റിംഗിലൂടെ വരുമാനം ഉണ്ടാക്കി കളവായ രീതിയില് പണം കൈക്കലാക്കിയെടുക്കലാണെന്നും നിര്മാതാക്കള് ഹര്ജിയില് പറയുന്നു.
