അന്ന് കഥാപാത്രം മരിച്ചു, ഇപ്പോൾ സമാനരീതിയിൽ നടനും; ചർച്ചയായി വിനോദ് തോമസിന്റെ മരണവും ഹ്രസ്വചിത്രവും

സിനിമപോലെയൊരു ജീവിതമായിരുന്നു വിനോദ് തോമസിന്റേതെന്ന് പറയുകയാണ് അടുപ്പമുള്ളവർ.
2016-ൽ ജിതിൻ ജോൺ പൂക്കോയി എഴുതി സംവിധാനംചെയ്ത ‘ലൈഫ്-ലിവ് ഫിയർലസ്’ എന്ന ഹ്രസ്വചിത്രത്തിൽ വിനോദ് തോമസ് ചെയ്ത കഥാപാത്രത്തിനും ഇതേ മരണമായിരുന്നു. ഒൻപതുമിനിറ്റ്‌ 55 സെക്കന്റ്‌ ദൈർഘ്യമുള്ള ഹ്രസ്വചിത്രത്തിൽ ശരവണൻ എന്ന ഡ്രൈവറുടെ വേഷമായിരുന്നു വിനോദിന്റേത്‌. എ.സി. ഓൺ ചെയ്‌ത് അടഞ്ഞ കാറിൽ ഇരിക്കുന്ന ഡ്രൈവർ വിഷവാതകം ശ്വസിച്ച്‌ മരിക്കുന്നതാണ്‌ ഒരു രംഗം. ഷോർട്ട്‌ സർക്യൂട്ട്‌, ഗ്യാസിൽനിന്നുള്ള തീപ്പിടിത്തം, വാഹനത്തിൽ എ.സി. അടഞ്ഞുണ്ടാകുന്ന വിഷപ്പുക എന്നിവ മൂലമുണ്ടാകുന്ന അപകടങ്ങളാണ്‌ ഹ്രസ്വചിത്രത്തിലെ പ്രമേയം.

കൊച്ചിൻ അന്താരാഷ്‌ട്ര വിമാനത്താവളത്തിലെ ഫയർ ആൻഡ് സേഫ്റ്റി വിഭാഗത്തിനുവേണ്ടി ഏഴുവർഷംമുമ്പ് ചെയ്ത വീഡിയോയാണിത്. ഇന്നും ഇത്തരത്തിൽ അപകടസാധ്യതയുണ്ടെന്ന്‌ ഹ്രസ്വചലച്ചിത്രത്തിന്റെ സംവിധായകൻ ജിതിൻ ജോൺ പറഞ്ഞു. വിനോദ് തോമസിന്റെ സംസ്കാരം ചൊവ്വാഴ്ച വൈകീട്ട് നാലിന് മുട്ടമ്പലം പൊതുശ്മശാനത്തിൽ നടന്നു

നിശബ്ദ്ധനായ കൊലയാളി എന്നാണ് കാർബൺ മോണോക്‌സൈഡിനെ അറിയപ്പെടുന്നത്. കാർബൺ മോണോക്‌സൈഡ് രക്തത്തിലെ ഹീമോഗ്ലോബിനുമായി ചേരുമ്പോൾ കാർബോക്‌സിഹീമോഗ്ലോബിൻ എന്ന പദാർഥം ഉണ്ടാവുന്നു, ഈ പദാർഥം ഓക്‌സിജൻ ശ്വാസകോശത്തിൽനിന്നും പേശികളിലെത്തിക്കുന്നത് തടയുന്നു. കേരളത്തിൽ ഉൾപ്പടെ നിരവധി പേർ കാർബൺ മോണോക്‌സൈഡ് ശ്വസിച്ച് മരിച്ചിട്ടുണ്ട്.

അന്തരീക്ഷ വായുവിൽ 35 parts per million (ppm) ൽ താഴെ ആണ് കാർബൺ മോണോക്‌സൈഡ് എങ്കിൽ സാധാരണ പ്രശ്‌നം ഉണ്ടാകാറില്ല. 400 ppm ൽ തലവേദന, തലചുറ്റൽ ഒക്കെ അനുഭവപ്പെടാം. 3,200 ppm ആകുമ്പോളേക്കും പത്തു മിനിറ്റിനകം അബോധാവസ്ഥയിൽ എത്താം; 12,800 ppm നു മുകളിൽ എത്തിയാൽ അത് ഉടനടി മരണകാരണം ആകും എന്നും പഠനങ്ങൾ പറയുന്നു.