തിരുവനന്തപുരം: നവകേരള സദസിനായി സ്കൂൾ ബസുകൾ വിട്ടു നൽകരുതെന്ന് ഹൈക്കോടതി. സ്കൂൾ ബസുകൾ വിട്ടു നൽകണമെന്ന പൊതുവിദ്യാഭ്യാസ ഡയറക്ടറുടെ ഉത്തരവ് കോടതി സ്റ്റേ ചെയ്തു. സംഘാടകർ ആവശ്യപ്പെട്ടാൽ ബസുകൾ വിട്ടു നൽകണമെന്നായിരുന്നു പൊതു വിദ്യാഭ്യാസ ഡയറക്ടറുടെ ഉത്തരവ്. എന്നാൽ കോടതിയിൽ നിന്നും ഉത്തരവ് ഉണ്ടാകുന്നതുവരെ ബസുകൾ വിട്ടു നൽകരുതെന്ന് ജസ്റ്റിസ് ദേവൻ രാമചന്ദ്രൻ വ്യക്തമാക്കി.
സ്കൂൾ ബസുകൾ ഇത്തരത്തിൽ വിട്ട് നൽകാൻ മോട്ടോർ വാഹന നിയമം അനുവദിക്കുന്നുണ്ടോ എന്ന കാര്യത്തിൽ കോടതി സർക്കാരിനോട് വിശദീകരണം തേടി. പൊതുവിദ്യാഭ്യാസ ഡയറക്ടറുടെ സർക്കുലർ നിയമവിരുദ്ധമാണെന്ന് കാട്ടി കാസർകോട് സ്വദേശി ഫിലിപ്പ് ജോസഫ് ഹൈക്കോടതിയെ സമീപിച്ചത്. ബസുകൾ വിട്ട് നൽകുന്നത് സ്കൂളുകളുടെ പ്രവർത്തനത്തെ ബാധിക്കുമെന്ന് ചൂണ്ടിക്കാട്ടിയായിരുന്നു ഹർജി.
സ്കൂൾ ബസുകൾ മറ്റാവശ്യങ്ങൾക്ക് ഉപയോഗിക്കുന്നത് മോട്ടോർ വാഹന നിയമത്തിന്റെ ലംഘനമാണ്. ഈ സാഹചര്യത്തിൽ പൊതുവിദ്യാഭ്യാസ ഡയറക്ടറുടെ ഉത്തരവ് അധികാരപരിധി മറികടന്നുള്ളതാണെന്ന ഹർജിക്കാരന്റെ വാദം കോടതി പ്രാഥമികമായി അംഗീകരിക്കുകയായിരുന്നു. സ്കൂൾ ബസുകൾ മറ്റാവശ്യങ്ങൾക്ക് ഉപയോഗിക്കാൻ പാടില്ലെന്ന ചട്ടത്തിൽ ഇളവ് വരുത്തിക്കൊണ്ടാണ് സർക്കാർ തീരുമാനം എടുത്തത്. .
ഇന്ധന ചെലവും ഡ്രൈവറുടെ ബാറ്റയും സംഘാടകർ നൽകണമെന്നും ഉത്തരവിൽ വ്യക്തമാക്കിയിരുന്നു. നവകേരള സദസ് നടക്കുന്ന ഇടങ്ങളിലെ സ്കൂളുകളിലെ പ്രധാന അധ്യാപകർക്കാണ് പൊതുവിദ്യാഭ്യാസ വകുപ്പ് നിർദേശം നൽകിയത്. പരിപാടിയിലേക്കെത്തുന്ന പൊതുജനങ്ങളുടെ സൗകര്യം പരിഗണിച്ചാണ് ബസുകൾ വിട്ടുനൽകാൻ നിർദേശം നൽകിയിരിക്കുന്നത്. അതേസമയം സ്കൂളിൽ വിദ്യാർത്ഥികളെ എത്തിക്കേണ്ട സമയം കഴിഞ്ഞാണോ ബസുകൾ വിട്ടു നൽകേണ്ടതെന്ന കാര്യം ഉത്തരവിൽ പറഞ്ഞിരുന്നില്ല.
