കൊച്ചി : എഴുത്തുകാരനും, തിരക്കഥാകൃത്തും സഹസംവിധായകനുമായ എന്.കെ.ശശിധരന് (68) അന്തരിച്ചു. 14 വര്ഷത്തോളം സഹസംവിധായനായി പ്രവര്ത്തിച്ച ശശിധരന്, മലയാളത്തിലെ ആദ്യകാല സിനിമാ പ്രവര്ത്തകരില് ഒരാളാണ്. സീരിയല് രംഗത്തും ശശിധരന് പ്രവര്ത്തിച്ചിട്ടുണ്ട്.
1955 നവംബര് ഇരുപത്തിയഞ്ചിന് കൊടുങ്ങല്ലൂരില് എന്.കെ സരോജിനി അമ്മയുടെയും ടി.ജി നാരായണപ്പണിക്കരുടെയും മകനായാണ് ജനനം. മലയാളത്തില് ബിരുദാന്തര ബിരുദം നേടിയിട്ടുണ്ട്.
രാജപരമ്പര, ചുവന്ന അങ്കി, അഗ്നിശലഭങ്ങള് എന്നീ ചിത്രങ്ങള്ക്ക് തിരക്കഥയും സംഭാഷണവുമെഴുതി. ആകാശവാണി നിലയങ്ങള്ക്കായി നിരവധി നാടകങ്ങള് എഴുതിയിട്ടുണ്ട്. രൗദ്രം, മര്മ്മരങ്ങള്, കോക്കസ്, കര്ഫ്യൂ, ഡര്ട്ടിഡസന്, അഗ്നിമുഖം, എക്സ്പ്ലോഡ്, മന്ത്രകോടി, ഡസ്റ്റിനേഷന്, ആസുരം, യുദ്ധകാണ്ഡം, അങ്കം, ചിലന്തി, ഞാന് സൂര്യപുത്രന് തുടങ്ങി അനവധി നോവലുകള് കൊണ്ട് മലയാളിയുടെ വായനയെ ത്രില്ലടിപ്പിച്ച എഴുത്തുകാരനായിരുന്നു എന്.കെ ശശിധരന്. ഇതില് കര്ഫ്യൂ സിനിമയാക്കിയിട്ടുണ്ട്. 2020ല് പ്രസിദ്ധീകരിച്ച അഗ്നി കിരീടമാണ് അവസാനമായി എഴുതിയ നോവല്.
