വിശാഖപട്ടണം : ആന്ധ്രാ വിശാഖപട്ടണത്തിലെ മത്സ്യബന്ധന തുറമുഖത്തുണ്ടായ തീപിടിത്തത്തില് 25 ബോട്ടുകള് കത്തിനശിച്ചു. ഞായറാഴ്ച രാത്രേിയോടെയാണ് തീപിടിത്തമുണ്ടായത്. തുറമുഖത്തെ ഒരു ബോട്ടിലുണ്ടായിരുന്ന എല്പിജി സിലിണ്ടറുകള് പൊട്ടിത്തെറിക്കുകയും അത് മറ്റ് ബോട്ടുകളിലേക്കും വേഗത്തില് പടരുകയായിരുന്നു.
സംഭവത്തിന്റെ ദൃശ്യങ്ങള് സമൂഹ മാധ്യമങ്ങളില് പ്രചരിക്കുന്നുണ്ട്. ചില സാമൂഹ്യ വിരുദ്ധര് തീയിട്ടതാണോയെന്നും പോലീസ് സംശയിക്കുന്നുണ്ട്. മദ്യപ സംഘം ബോട്ടില് പാര്ട്ടി നടത്തുന്നതിനിടെയാണ് അപകടമുണ്ടായതെന്നും സംശയിക്കുന്നുണ്ട്. അപകടത്തില് 25 ഓട്ടോമേറ്റഡ് ബോട്ടുകളാണ് കത്തി നശിച്ചത്. തീ പടരുന്നത് കണ്ട് ബോട്ടുകളില് കിടന്നുറങ്ങിയിരുന്ന മത്സ്യത്തൊഴിലാളികള് ഓടി രക്ഷപ്പെട്ടു.
തീപിടിത്തമുണ്ടായ ഉടന് തന്നെ പോലീസും ഫയര്ഫോഴ്സ് സംഘവും എത്തി. ആര്ക്കും പരിക്കേറ്റതായി റിപ്പോര്ട്ടില്ല. വിശാഖപട്ടണം സംഭവത്തില് പോലീസ് അന്വേഷണം ആരംഭിച്ചു. ദിവസങ്ങള്ക്കുമുമ്പ് ആന്ധ്രാപ്രദേശിലെ നിസാംപട്ടണം തുറമുഖത്ത് ഒരു ബോട്ടിലുണ്ടായ തീപിടിത്തത്തില് രണ്ടുപേര്ക്കു പരുക്കുപറ്റിയിരുന്നു.
