മാറക്കാന: വരുന്ന ശനിയാഴ്ച നടക്കുന്ന ബ്രസീല്‍-അര്‍ജന്റീന ഏറ്റുമുട്ടലില്‍ ഇരുടീമുകളുടെയും മുന്‍നിര താരങ്ങളില്‍ മാറ്റങ്ങള്‍ക്ക് സാധ്യത. പരിക്കേറ്റ വിങ്ങര്‍ വിനീഷ്യസ് ജൂനിയറിന് പരിക്കേറ്റതാണ് ബ്രസീലിന് പ്രശ്‌നം. പ്രായംചെന്ന താരം എയ്ഞ്ചല്‍ ഡി മരിയയ്‌ക്ക് പകരക്കാരനെ കണ്ടെത്താനുള്ള ശ്രമത്തിന്റെ ഭാഗമായാണ് അര്‍ജന്റീനയുടെ നീക്കം.
2026 ഫിഫ ലോകകപ്പ് ഫുട്‌ബോളിലേക്കുള്ള കോന്‍മെബോല്‍ യോഗ്യതാ മത്സരത്തിലാണ് ശനിയാഴ്ച വെളുപ്പിന് ആറിന് വമ്പന്മാര്‍ നേര്‍ക്കുനേര്‍ വരിക. ബ്രസീലിലെ പ്രസിദ്ധമായ മാറക്കാന സ്റ്റേഡിയത്തിലാണ് പോരാട്ടം.
എയ്ഞ്ചല്‍ ഡി മരിയ നിലവില്‍ കളിച്ചുവരുന്ന വിങ് പൊസിഷനില്‍ വരും കാലത്തേക്ക് ഒരാളെ കണ്ടെത്താനുള്ള ശ്രമത്തിലാണ് സ്‌കലോനി. അതിനായി നിക്കോളാസ് ഗോന്‍സാലെസിനെയായിരിക്കും ഇറക്കുക. നിലവിലെ ഇറ്റാലിയന്‍ സീരി എ ക്ലബ്ബ് ഫിയോറെന്റീനയുടെ താരമാണ്. തീരുമാനം മുമ്പേ ഉണ്ടായിരുന്നുവെങ്കിലും കഴിഞ്ഞ മത്സരത്തിലേറ്റ ഞെട്ടിക്കുന്ന തോല്‍വി സ്‌കലോനിയെയും സംഘത്തെയും ഉലച്ചിട്ടുണ്ട്. ലോകകപ്പ് നേടിയ ശേഷം ആദ്യ തോല്‍വിയാണ് കഴിഞ്ഞ മത്സരത്തില്‍ ഉറുഗ്വായ്‌ക്കെതിരെ വഴങ്ങിയത്. സ്വന്തം നാട്ടില്‍ എതിരില്ലാത്ത രണ്ട് ഗോളുകള്‍ക്കായിരുന്നു തോല്‍വി.
ബ്രസീല്‍ പരിശീലകന്‍ ഫെര്‍ണാണ്ടോ ഡിനിസും വലിയ സമ്മര്‍ദ്ദത്തിലാണ്. ലോകകപ്പ് യോഗ്യതാ മത്സരത്തില്‍ തുടരെ രണ്ട് തോല്‍വികളാണ് ടീം വഴങ്ങിയത്. പരിക്കേറ്റ വിനിഷ്യസ് ജൂനിയറിന് പകരക്കാരനായി വിങ്ങില്‍ ഗബ്രിയേല്‍ ജെസ്യൂസിനെ ഇറക്കാനാണ് പദ്ധതി.
പ്രതികരിക്കാൻ ഇവിടെ എഴുതുക: