പത്തനംതിട്ട : പിഴയിട്ടിട്ടും അധികൃതരെ വെല്ലുവിളിച്ച് കോയമ്പത്തൂര് സര്വീസ് നടത്തുന്ന റോബിന് ബസിന് പണി കൊടുക്കാന് കെ എസ് ആര് ടി സി. പത്തനംതിട്ട ഈരാറ്റുപേട്ട കോയമ്പത്തൂര് വോള്വോ എസി സര്വീസ് ഞായറാഴ്ച മുതല് ആരംഭിക്കും. പത്തനംതിട്ടയില് നിന്നും വെളുപ്പിന് 4:30ന് ആരംഭിക്കുന്ന സര്വീസ് തിരികെ കോയമ്പത്തൂരില് നിന്നും വൈകുന്നേരം 4:30ന് പുറപ്പെടും. റാന്നി, എരുമേലി, കാഞ്ഞിരപ്പള്ളി, ഈരാറ്റുപേട്ട, തൊടുപുഴ, മൂവാറ്റുപുഴ, അങ്കമാലി, തൃശൂര്, വടക്കാഞ്ചേരി, പാലക്കാട് വഴി റോബിന് ബസിന്റെ അതേ റൂട്ടിലാണ് സര്വീസ്.
റോബിന് ബസ് കോയമ്പത്തൂരിലേക്കുള്ള സര്വീസ് തുടങ്ങിയശേഷം നാലു തവണയാണ് മോട്ടോര് വാഹന വകുപ്പ് തടഞ്ഞത്. പിഴയായി 37500 രൂപയാണ് ഇട്ടത്. എന്നാല് ബസ് പിടിച്ചെടുക്കരുതെന്ന കോടതി ഉത്തരവുളളതിനാല് വിട്ടയച്ചു.
എന്നാല് ഇതിനെതിരെ വിവിധയിടങ്ങളില് നാട്ടുകാര് പ്രതിഷേധിച്ചതിനിടെ വിഷയത്തില് പ്രതികരണവുമായി ഗതാഗത മന്ത്രി ആന്റണി രാജു രംഗത്തുവന്നു. നിയമം എല്ലാവര്ക്കും ബാധകമാണെന്നും ബസിനെതിരെ സ്വീകരിക്കുന്നത് പ്രതികാര നടപടിയല്ലെന്നും മന്ത്രി പറഞ്ഞു. കോണ്ട്രാക്ട് കാര്യേജ് ലൈസന്സാണ് റോബിന് ബസിനുളളത്. ഇത് പ്രകാരം ബോര്ഡ് വച്ച് ഓരോ സ്ഥലത്തും നിര്ത്തി ആളെ കയറ്റി യാത്ര നടത്താനാകില്ല. റോബിന് ബസിന് യാത്രാനുമതി നല്കിയാല് കെ എസ് ആര് ടി സിയെ അല്ല ബാധിക്കുകയെന്നും സ്റ്റേജ് കാര്യര് ലൈസന്സ് എടുത്ത് സര്വീസ് നടത്തുന്ന സ്വകാര്യ ബസുകളെയാണെന്നും മന്ത്രി പറഞ്ഞു. കൂടുതല് ബസുകളുളളത് സ്വകാര്യ മേഖലയിലാണെന്നതാണ് ഇതിന് കാരണമെന്ന് മന്ത്രി ചൂണ്ടിക്കാട്ടി.
നിയമപോരാട്ടത്തിന് തയാറാണെന്നും ഹൈക്കോടതി പിഴയീടാക്കിയാല് മാത്രമേ പിഴ ഒടുക്കുവെന്നും ഉടമ ഗിരീഷ് പറഞ്ഞു. അഖിലേന്ത്യാ പെര്മിറ്റാണ് തന്റെ ബസിനുളളതെന്നും അദ്ദേഹം പറഞ്ഞു.
അഞ്ച് മണിക്ക് പത്തനംതിട്ട ബസ് സ്റ്റാന്ഡില് നിന്ന് പുറപ്പെട്ട റോബിന് ബസ് 200 മീറ്റര് പിന്നിട്ടപ്പോഴേക്കും എംവിഡി വകുപ്പ് ഉദ്യോഗസ്ഥരെത്തി പരിശോധന നടത്തുകയായിരുന്നു. നിയമ ലംഘനത്തിന്റെ പേരില് കഴിഞ്ഞ ഒക്ടോബര് 16നാണ് പത്തനംതിട്ടയില് നിന്ന് കോയമ്പത്തൂരിലേക്ക് പുറപ്പെട്ട ബസ് റാന്നിയില് വെച്ച് മോട്ടോര്വെഹിക്കിള് ഉദ്യോഗസ്ഥര് പിടിച്ചെടുത്തത്. നീണ്ട നിയമ പോരാട്ടത്തിനൊടുവിലാണ് ബസ് കോടതി ഉത്തരവിലൂടെ വിട്ടയച്ചത്.
