തൃശൂർ: എത്രയോ ദശകങ്ങളായി മണ്ഡല-മകരവിളക്ക് കാലത്ത് അയ്യപ്പന്മാര്‍ തണലേകാറുള്ള കൊടുങ്ങല്ലൂർ ക്ഷേത്രത്തിലെ അയ്യപ്പ വിശ്രമ കേന്ദ്രത്തിന് ഇക്കുറി അനുമതി നിഷേധിച്ച് ദേവസ്വം ബോര്‍ഡ്. ഇടത് സര്‍ക്കാരിന്റെ ഗൂഢാലോചനയുടെ ഭാഗമായാണ് ദേവസ്വം ബോര്ഡിന്റെ ഈ നീക്കം.
ഇതിനെതിരെ അയ്യപ്പഭക്തര്‍ കഴിഞ്ഞ ദിവസം പ്രതിഷേധിച്ചു. ദേവസ്വം ബോര്‍ഡ് കൊടുങ്ങല്ലൂര്‍ ക്ഷേത്രത്തിനകത്ത് വിശ്രമ കേന്ദ്രത്തിനുള്ള അനുമതി നിഷേധിച്ചാലും അയ്യപ്പ ഭക്തർക്കായി ഇടത്താവളത്തിൽ സൗകര്യം ഒരുക്കാനാണ് ഹൈന്ദവ സംഘടനകളുടെ തീരുമാനം.
അയ്യപ്പ തീര്‍ത്ഥാടകരുടെ പ്രധാന ഇടത്താവളങ്ങളില്‍ ഒന്നാണ് കൊടുങ്ങല്ലൂരിലെ ക്ഷേത്രം. കഴിഞ്ഞ 32 വർഷമായി ക്ഷേത്ര സംരക്ഷണ സമിതിയുടെ നേതൃത്വത്തിൽ ഭക്ഷണവും വൈദ്യസഹായവും ഉൾപ്പെടെ അയ്യപ്പഭക്തര്‍ക്ക് നൽകി വരുന്ന വിശ്രമ കേന്ദ്രത്തിനാണ് സിപിഎമ്മിന്റെ വില കുറഞ്ഞ രാഷ്ട്രീയം മൂലം തടസ്സം സൃഷ്ടിച്ചിരിക്കുന്നത്.
അയ്യപ്പ ഭക്തർക്ക് ബുദ്ധിമുട്ടുണ്ടാക്കുന്ന ഭരണസമിതിയുടെയും ദേവസ്വം ബോർഡിന്റെയും തീരുമാനത്തിനെതിരെ സംഘടിപ്പിച്ച പ്രതിഷേധം ഹിന്ദു ഐക്യവേദി സംസ്ഥാന ജനറൽ സെക്രട്ടറി പി. സുധാകരൻ ഉദ്ഘാടനം ചെയ്തു. പ്രതിഷേധ സംഗമത്തിൽ ക്ഷേത്ര സംരക്ഷണ സമിതിയുടെയും മാതൃ സമിതിയുടെയും ഭാരവാഹികൾ പങ്കെടുത്തു.
പ്രതികരിക്കാൻ ഇവിടെ എഴുതുക: