റാഞ്ചിയിൽ സമാന രീതിയിൽ ക്ഷേത്രങ്ങളിലെ വിഗ്രഹങ്ങൾ തകർത്ത് സാമൂഹ്യവിരുദ്ധർ; പ്രതിഷേധവുമായി റോഡ് ഉപരോധിച്ച് പ്രദേശവാസികൾ

റാഞ്ചി: മന്ദറിനടുത്തുള്ള മുദ്ദ ഗ്രാമത്തിലെ ക്ഷേത്ര വിഗ്രഹങ്ങൾ തല്ലി തകർത്ത് പ്രദേശത്തെ സാമൂഹ്യവിരുദ്ധർ. സംഭവത്തിന് ശേഷവും പ്രതികളെ പിടികൂടാത്തതിൽ പ്രതിഷേധിച്ച് പ്രദേശവാസികൾ. പ്രതികളെ അറസ്റ്റ് ചെയ്യണമെന്ന ആവശ്യം ഉന്നയിച്ച് പ്രദേശവാസികൾ ദേശീയപാത ഉപരോധിച്ചു.

പ്രഭാത സവാരിക്കിറങ്ങിയ പ്രദേശവാസികളാണ് ക്ഷേത്രത്തിലെ വിഗ്രഹങ്ങൾ തകർത്തത് കാണുന്നത്. സംശയം തോന്നിയതിനെ തുടർന്ന് സമീപ പ്രദേശങ്ങളിലെ ക്ഷേത്രങ്ങൾ കൂടി ഇവർ സന്ദർശിച്ചു. ഇതോടെ ഈ ക്ഷേത്രങ്ങളിലെയും വിഗ്രഹങ്ങൾ സമാന രീതിയിൽ തകർത്തതായി കണ്ടെത്തി.

പിന്നാലെ ഗ്രാമത്തിലുള്ളവരെ വിവരം അറിയിച്ചു. ഇതിന് ശേഷമാണ് ദേശീയ പാത ഉപരോധിച്ചത്. പ്രതികളെ 24 മണിക്കൂറിനുള്ളിൽ പിടികൂടണമെന്നതാണ് ഗ്രാമവാസികളുടെ ആവശ്യം. കൂടാതെ ക്ഷേത്രങ്ങൾക്ക് സംരക്ഷണ ഭിത്തി സജ്ജമാക്കണമെന്നും ക്ഷേത്രം പുനർ നിർമ്മിക്കുന്നതിന് ആവശ്യമായ കാര്യങ്ങൾ നടത്തണമെന്നും അത് വരെയും ക്ഷേത്രത്തിന് പോലീസ് സംരക്ഷണം ഏർപ്പെടുത്തണമെന്നും ആവശ്യം ഉന്നയിച്ചിട്ടുണ്ട്.