തിരുവനന്തപുരം: നവകേരള സദസിന് മുഖ്യമന്ത്രിയും മന്ത്രിമാരും സഞ്ചരിക്കുന്ന കെഎസ്ആര്‍ടിസി ബെന്‍സ് ആഢംബര ബസ് കേരളത്തിലേക്കെത്തുന്നതിന് മുമ്പ് ഇളവുകള്‍ നല്‍കി സര്‍ക്കാര്‍ ഉത്തരവിറങ്ങി. കോണ്‍ട്രാക്ട് ക്യാരേജ് പെര്‍മിറ്റില്‍ ആണ് ബസ് രജിസ്റ്റര്‍ ചെയ്യുന്നത് . എന്നാല്‍ മറ്റ് കോണ്‍ട്രാക്ട് ക്യാരേജ് ബസുകള്‍ക്കുള്ള നിയമങ്ങള്‍ ഈ ബസിന് ബാധകമല്ല.
ടൂറിസ്റ്റ് ബസുകളുടെ വെള്ള നിറത്തിലെ കളര്‍ കോഡും ഈ ആഡംബര ബസിന് ബാധകമല്ലെന്ന് ഉത്തരവിലുണ്ട്. സര്‍ക്കാരിനും സര്‍ക്കാര്‍ നിര്‍ദേശിക്കുന്ന വിവിഐപികള്‍ക്കും ബസ് ആവശ്യപ്പെടുമ്പോള്‍ വിട്ടു നല്‍കണം നിര്‍ദേശം. നവകേരള സദസിന് ശേഷം കെഎസ്ആര്‍ടിസിയുടെ ടൂറിസം പദ്ധതിക്കായി ബസ് പ്രയോജനപ്പെടുത്തും.
പുറത്തുനിന്ന് വൈദ്യുതിയില്‍ ബസില്‍ ഏസിയും ഇന്‍വേര്‍ട്ടറും പ്രവര്‍ത്തിപ്പിക്കാം. ശുചിമുറി, മിനികിച്ചന്‍ എന്നിവ ബസിലുണ്ട്. മുഖ്യമന്ത്രിക്ക് വേണ്ടി ഏറ്റവും മുന്നില്‍ 180ഡിഗ്രി തിരിയുന്ന പ്രത്യേക ഓട്ടമാറ്റിക് സീറ്റുണ്ട്.
ബസിനായി 1.05 കോടി രൂപ ധനവകുപ്പ് അനുവദിച്ചിരുന്നു. ഷാസിയുടെവില 44 ലക്ഷം രൂപ. 11 ലക്ഷം രൂപ വരുന്ന ബയോ ടോയ്ലറ്റ്, ഫ്രിജ്, മൈക്രോവേവ് അവ്ന്‍, ആഹാരം കഴിക്കാന്‍ പ്രത്യേക സ്ഥലം, വാഷ് ബെയ്‌സിന്‍ എന്നിങ്ങനെ സൗകര്യങ്ങള്‍ ബസിലുണ്ട്. മുഖ്യമന്ത്രിക്കൊപ്പം 20 മന്ത്രിമാരും ചീഫ് സെക്രട്ടറിയും ബസിലുണ്ടാകും.
ഈ മാസം 18 മുതല്‍ ഡിസംബര്‍ 24 വരെയാണ് നവകേരള സദസ്.നാളെ ഉച്ച തിരിഞ്ഞ് 3.30 ന് മഞ്ചേശ്വരം പൈവെളിഗെ സര്‍ക്കാര്‍ ഹയര്‍ സെക്കന്‍ഡറി സ്‌കൂളിലാണ് സംസ്ഥാനതല ഉദ്ഘാടനം. 140 നിയോജകമണ്ഡലങ്ങളിലും നവ കേരള സദസ് സംഘടിപ്പിക്കും.
പ്രതികരിക്കാൻ ഇവിടെ എഴുതുക: