ബിഗ് ബോസ് മലയാളം മൂന്നാം സീസണിലൂടെ ജനപ്രിയ താരമായയാളാണ് ഋതു മന്ത്ര. മോഡലായിട്ടും പരസ്യ ചിത്രങ്ങളിലൂടെയുമാണ് ഋതു ശ്രദ്ധേയയായത്. ബിഗ് ബോസിലെത്തിയ ഋതു ഫൈനലിസ്റ്റുകളിലൊരാളായിരുന്നു.
ഇപ്പോഴിതാ തന്റെ ജീവിതത്തിലെ പുതിയനേട്ടമാണ് ഇന്സ്റ്റാഗ്രാമിലൂടെ ഋതു പങ്കിടുന്നത്.
ലാത്വിയയിൽ നടന്ന ലോക ജുജിറ്റ്സു ചാമ്പ്യൻഷിപ്പിൽ ഇന്ത്യയ്ക്കായി രണ്ടു വെങ്കല മെഡലുകൾ നേടിയിരിക്കുകയാണ് ഋതു മന്ത്ര ഇപ്പോൾ. മമ്മൂട്ടിയ്ക്ക് നല്കിയ വാക്ക് പാലിച്ചു എന്നാണ് ഋതു പങ്കുവയ്ക്കുന്നത്. ലാത്വിയയില് നടന്ന ലോക ജുജിറ്റ്സു ചാമ്പ്യന്ഷിപ്പിന് പോകുന്നതിനായി സ്പോണ്സര്ഷിപ്പ് ചെയ്തത് മമ്മൂട്ടിയായിരുന്നു.
“നിങ്ങൾക്കായി വലിയൊരു ലക്ഷ്യം സജ്ജീകരിക്കുക. ലാത്വിയയിൽ നടന്ന 2023 ലെ ജുജിറ്റ്സു ലോക ചാമ്പ്യൻഷിപ്പിൽ, ക്ലോസ് കോണ്ടാക്റ്റിലും സെൽഫ് ഡിഫെൻസിലുമായി 2 വെങ്കല മെഡലുകൾ നേടാൻ കഴിഞ്ഞതിൽ ഞാൻ അഭിമാനിക്കുന്നു. നിങ്ങളുടെ പ്രാർത്ഥനയ്ക്കും പിന്തുണയ്ക്കും നന്ദി. പ്രോത്സാഹനത്തിനും സ്പോൺസർഷിപ്പിനും ഞങ്ങളുടെ സ്വന്തം മമ്മൂക്കയ്ക്ക് നന്ദി,” ഋതു കുറിക്കുന്നു.
മെഡല് നേടിയ ഋതുമന്ത്രയെ അഭിനന്ദിച്ച് സിനിമാമേഖലയില് നിന്ന് ആശംസാപ്രവാഹവുമായി താരങ്ങള് രംഗത്തെത്തി.
“ലോക ചാമ്പ്യൻഷിപ്പിൽ 2 വെങ്കല മെഡലുകൾ നേടി നമ്മുടെ നാടിനും നമുക്കെല്ലാവർക്കും അഭിമാനമായതിന് അഭിനന്ദനങ്ങൾ ഋതു. സിനിമാലോകത്തിന് അഭിമാന നിമിഷം,” ദിലീപ് കുറിക്കുന്നു. ദിലീപിന്റെ കിങ് ലയര് എന്ന ചിത്രത്തില് ഋതുമന്ത്ര അഭിനയിച്ചിട്ടുണ്ട്.
‘കണ്ണൂരില് നിന്നുള്ള നമ്മുടെ മലയാളി പെണ്കുട്ടി. ജുജിറ്റ്സുവിനായി ലോക ചാമ്പ്യന്ഷിപ്പില് 2 വെങ്കല മെഡലുകള് നേടി. നമ്മുടെ നാടിന്റെ അഭിമാനം ഉയര്ത്തിയിരിക്കുന്നു. ഋതുവിനെ അനുഗ്രഹിക്കട്ടെ!!!!’ എന്നാണ് നടിയും സംവിധായികയുമായ ഗീതു മോഹന്ദാസ് കുറിച്ചത്.
ചാമ്പ്യന്ഷിപ്പില് വിജയം നേടിയ ചിത്രങ്ങളും വീഡിയോകളും താരം പങ്കുവെച്ചിരുന്നു. ത്രിവര്ണ പതാകയേന്തിയുള്ള താരത്തിന്റെ ചിത്രങ്ങളെല്ലാം ആരാധകര് ഇതിനോടകം ഏറ്റെടുത്ത് കഴിഞ്ഞു.
ഏതാനും മാസങ്ങള്ക്കു മുന്പ് ഇസ്രായേല് ആയോധന കലയായ ക്രാവ് മാഗ ദേശീയ ചാമ്പ്യന്ഷിപ്പിലും ഋതു പങ്കെടുത്തിരുന്നു. ക്രാവ് മാഗയില് താരം സ്വര്ണ മെഡല് നേടിയിരുന്നു. രാജന് വര്ഗ്ഗീസിനു കീഴിലുള്ള ക്രാവ് മാഗ ഫെഡറേഷന് ഓഫ് ഇന്ത്യയിലാണ് ഋതു പരിശീലനം നേടിയത്. ഇസ്രായേല് പ്രതിരോധസേന വികസിപ്പിച്ചെടുത്ത ആയോധന കലയാണ് ക്രാവ് മാഗ.
