ഭോജ്പൂര് (മധ്യപ്രദേശ്): അഴിമതിയും കുടുംബാധിപത്യവും നാടുവാഴിത്തവും ചേര്ന്നാല് കോണ്ഗ്രസ് പാര്ട്ടിയായെന്ന് ബിജെപി ദേശീയ അധ്യക്ഷന് ജെ.പി. നദ്ദ. വികസനവും പുരോഗതിയും അവകാശ സംരക്ഷണവുമാണ് ബിജെപിയുടെ ലക്ഷ്യം, ഭോജ്പൂരില് മഹാറാലിയില് പ്രസംഗിക്കവേ നദ്ദ പറഞ്ഞു.
പാര്ട്ടി നയങ്ങളെ വികസനമായി മാറ്റുകയാണ് ബിജെപി. എന്നാല് ജനങ്ങളുടെ അവകാശങ്ങള് കവര്ന്ന് അവരെ പറ്റിക്കുകയാണ് കോണ്ഗ്രസിന്റെ എക്കാലത്തേയും പ്രവൃത്തി. അഴിമതിയാണ് കോണ്ഗ്രസിന്റെ മുഖമുദ്ര.
അധികാരത്തിലിരുന്നപ്പോള് ശ്രീരാമന് എന്നത് ഭാവന മാത്രമാണെന്നും ശാസ്ത്രീയവും ചരിത്രപരവുമായ യാതൊരു അടിത്തറയും അതിനില്ലെന്നും പറഞ്ഞ പാര്ട്ടിയാണ് കോണ്ഗ്രസ്.
എന്നാല് ഇന്ന് കോണ്ഗ്രസ് നേതാക്കള് ഭഗവാന് രാമന്റെ പാദങ്ങളില് വീണു നമസ്കരിക്കുന്നു. പണ്ട് ബിജെപി അയോധ്യയില് രാമക്ഷേത്രം നിര്മിക്കുമെന്ന് പറഞ്ഞപ്പോള് ആ തീയതി ഒന്നറിയിക്കാമോ എന്ന് പരിഹസിച്ചവരാണ് കോണ്ഗ്രസ് നേതാക്കള്. ജനുവരി 22 ആണ് ആ തീയതി, ജെ.പി. നദ്ദ വ്യക്തമാക്കി.
