ലണ്ടന്‍: ഇംഗ്ലീഷ് പ്രീമിയര്‍ ലീഗിലെ സൂപ്പര്‍ പോരാട്ടത്തില്‍ മാഞ്ചസ്റ്റര്‍ സിറ്റിയെ സമനിലയില്‍ തളച്ച് ചെല്‍സി. അത്യന്തം ആവേശകരമായ പോരാട്ടത്തില്‍ രണ്ട് ടീമുകളും നാല് ഗോളുകള്‍ വീതം നേടി. കളിയുടെ ഇഞ്ചുറി സമയതത് കോളെ പാല്‍മെര്‍ പെനാല്‍റ്റിയിലൂടെ നേടിയ ഗോളാണ് ചെല്‍സിക്ക് സമനില സമ്മാനിച്ചത്. സിറ്റിക്കായി സൂപ്പര്‍ താരം എര്‍ലിങ് ഹാളണ്ട് രണ്ട് ഗോള്‍ നേടി. 25-ാം മിനിറ്റില്‍ പെനാല്‍റ്റിയിലൂടെയും 47-ാം മിനിറ്റിലുമായിരുന്നു ഹാളണ്ടിന്റെ ഗോള്‍.
ആദ്യപകുതിയുടെ പരിക്ക് സമയത്ത് മാനുവല്‍ അകാന്‍ജി, 86-ാം മിനിറ്റില്‍ റോഡ്രി എന്നിവരും സിറ്റിക്കായി ലക്ഷ്യം കണ്ടു. ചെല്‍സിക്കായി തിയാഗോ സില്‍വ, റഹിം സ്റ്റര്‍ലിങ്, നിക്കോളാസ് ജാക്‌സണ്‍ എന്നിവരും ഗോള്‍ നേടി. സമനിലയില്‍ പിരിഞ്ഞെങ്കിലും 12 കളികളില്‍ നിന്ന് 28 പോയിന്റുമായി സിറ്റി പട്ടികയില്‍ ഒന്നാം സ്ഥാനത്ത് തുടരുന്നു.
മറ്റൊരു കളിയില്‍ മുഹമ്മദ് സലാ നേടിയ ഇരട്ട ഗോള്‍ മികവില്‍ ലിവര്‍പൂളും വിജയം കണ്ടു. ബ്രെന്റ്‌ഫോഡിനെ മറുപടിയില്ലാത്ത മൂന്ന് ഗോളുകള്‍ക്ക് തോല്‍പ്പിച്ചു. വിജയത്തോടെ 12 കളികളില്‍ നിന്ന് 27 പോയിന്റുമായി ലിവര്‍പൂള്‍ രണ്ടാം സ്ഥാനത്തേക്കുയര്‍ന്നു. മറ്റ് കളികളില്‍ ആസ്റ്റണ്‍ വില്ല ഒന്നിനെതിരെ മൂന്ന് ഗോളുകള്‍ക്ക് ഫുള്‍ഹാമിനെയും വെസ്റ്റ്ഹാം യുണൈറ്റഡ് 3-2ന് നോട്ടിങ്ഹാം ഫോറസ്റ്റിനെയും കീഴടക്കി.
പ്രതികരിക്കാൻ ഇവിടെ എഴുതുക