തിരുവനന്തപുരം: ക്ഷേത്രപ്രവേശന വിളംബര വാര്ഷിക നോട്ടീസുമായി ബന്ധപ്പെട്ട വിവാദത്തില് നോട്ടീസ് പുറത്തിറക്കിയ സാംസ്കാരിക പുരാവസ്തു വകുപ്പ് ഡയറക്ടര് ബി മധുസൂദനന് നായരെ ചുമതലയില് നിന്ന് നീക്കി ദേവസ്വം ബോര്ഡ്. ഇന്ന് ചേര്ന്ന ദേവസ്വം ബോര്ഡ് യോഗത്തിന്റേതാണ് തീരുമാനം.
ക്ഷേത്രപ്രവേശന വിളംബരത്തിന്റെ 87ാം വാര്ഷികാഘോഷത്തിന് തയാറാക്കിയ നോട്ടീസാണ് നേരത്തെ വിവാദമായത്. രാജഭക്തി മുഴച്ചുനില്ക്കുന്ന നോട്ടീസില് പരിപാടിയിലെ അതിഥികളായ രാജകുടുംബാംഗങ്ങളെ വിശേഷിപ്പിക്കുന്നത് രാജ്ഞിമാര്, തമ്പുരാട്ടിമാര് എന്നായിരുന്നു. ക്ഷേത്രപ്രവേശനത്തിന് പിന്നില് രാജാവിന്റെ ഔദാര്യമാണെന്ന് തോന്നിപ്പിക്കുന്ന വരികളുമുണ്ടായിരുന്നു.
വിവാദമായതിനെ തുടര്ന്ന് നോട്ടീസ് പിന്വലിച്ചെങ്കിലും ആവശ്യമെങ്കില് അന്വേഷിച്ച് നടപടിയെടുക്കുമെന്ന് ദേവസ്വം ബോര്ഡ് പ്രസിഡന്റ് അഡ്വ. അനന്തഗോപന് അറിയിച്ചിരുന്നു. പിന്നാലെയാണ് ഡയറക്ടറെ നീക്കിയത്.
വിവാദത്തെ തുടര്ന്ന് തിരുവിതാംകൂര് ദേവസ്വം ബോര്ഡ് സംഘടിപ്പിച്ച ക്ഷേത്രപ്രവേശന വിളംബര പരിപാടിയില് നിന്ന് തിരുവിതാംകൂര് രാജകുടുംബാംഗങ്ങളായ ഗൗരി ലക്ഷ്മി ഭായിയും ഗൗരി പാര്വതി ഭായിയും വിട്ടു നിന്നു.
