ഇടുക്കി: മൂന്നാർ ദേവികുളത്ത് പട്ടാപ്പകൽ വീട്ടിൽ കയറി യുവതിയെ ആക്രമിച്ച സംഭവത്തിൽ പ്രതി പിടിയിൽ. ചൊക്കനാട് സ്വദേശി രാംകുമാറാണ് പിടിയിലായത്. മോഷണ ശ്രമത്തിനിടെയായിരുന്നു ആക്രമണം. തലയ്‌ക്ക് ഗുരുതരമായി പരിക്കേറ്റ യുവതി ആശുപത്രിയിൽ ചികിത്സയിലാണ്. ദേവികുളം കോടതി ജീവനക്കാരനായ റെജിയുടെ വീട്ടിലായിരുന്നു ആക്രമണം.
റെജിയുടെ ഭാര്യ ടെസിയും കുട്ടിയും മാത്രമാണ് വീട്ടിലുണ്ടായിരുന്നത്. ഇത് മനസിലാക്കിയ പ്രതി മോഷണത്തിന് എത്തുകയായിരുന്നു. വീടിന് പുറകിലെത്തിയ പ്രതി കയ്യിൽ കരുതിയിരുന്ന മുളക് പൊടി വിതറുകയും യുവതിയെ ആക്രമിക്കുകയുമായിരുന്നു. മരക്കഷണവും കല്ലും ഉപയോഗിച്ച് യുവതിയെ ആക്രമിച്ചു. യുവതിയുടെ നിലവിളിയെ തുടർന്ന് പ്രദേശവാസികൾ എത്തിയപ്പോഴേക്കും പ്രതി ഓടി രക്ഷപ്പെട്ടിരുന്നു.
തമിഴ്‌നാട്ടിൽ താമസിക്കുന്ന പ്രതി അടുത്തിടെയാണ് മൂന്നാറിലേക്ക് തിരികെ എത്തിയത്. ഇന്നലെ തന്നെ തെളിവെടുപ്പ് നടപടികൾ പൂർത്തിയാക്കി. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
പ്രതികരിക്കാൻ ഇവിടെ എഴുതുക: