14-കാരനെ പോലീസ് സ്‌റ്റേഷനിൽ വിളിച്ചു വരുത്തി മർദ്ദിച്ച സംഭവം; ബാലാവകാശ കമ്മീഷൻ കേസെടുത്തു

തിരുവനന്തപുരം: പതിനാലുകാരനെ പോലീസ് സ്‌റ്റേഷനിൽ വെച്ച് മർദ്ദിച്ച സംഭവത്തിൽ കേസെടുത്ത് ബാലാവകാശ കമ്മീഷൻ. സംഭവത്തിൽ അടിയന്തരമായി റിപ്പോർട്ട് നൽകണമെന്ന് ബാലാവകാശ കമ്മീഷൻ ജില്ലാ പോലീസ് മേധാവിക്ക് നിർദ്ദേശം നൽകിയിട്ടുണ്ട്.

അതിഥി തൊഴിലാളിയുടെ പത്താം ക്ലാസുകാരനായ മകനെ മണ്ണഞ്ചേരി പോലീസ് സ്‌റ്റേഷനിൽ വിളിച്ചു വരുത്തി മർദ്ദിച്ചു എന്നായിരുന്നു പരാതി.മുതുകിൽ ചവിട്ടിയെന്നും ചൂരൽ ഉപയോഗിത്ത് കൈയിൽ അടിച്ചുവെന്നും പരാതിയിൽ ആരോപിക്കുന്നു. വാഹനാപകടവുമായി ബന്ധപ്പെട്ടായിരുന്നു കുട്ടിയെ സ്റ്റേഷനിലേക്ക് വിളിച്ചു വരുത്തിയത്.

മാതാപിതാക്കളെ കാണിക്കാതെ ആറ് മണിക്കൂറോളം കുട്ടിയെ കസ്റ്റഡിയിൽ വെച്ചുവെന്നും ആരോപണം ഉയരുന്നുണ്ട്. ശിശു സംരക്ഷണ സമിതിയാണ് ബാലാവകാശ കമ്മീഷന് പരാതി കൈമാറിയത്.