അയോധ്യയില്‍ ആഘോഷമായി ദീപാവലി, ശ്രീരാമപട്ടാഭിഷേകം നടത്തി യോഗി ആദിത്യനാഥ്, ആഘോഷത്തില്‍ പങ്കെടുത്ത് നയതന്ത്രജ്ഞരും

അയോധ്യ: ഉത്തര്‍പ്രദേശ് സര്‍ക്കാരിന്റെ ദീപാവലി ആഘോഷത്തോടനുബന്ധിച്ച് ശനിയാഴ്ച ‘ദീപോത്സവം’ സംഘടിപ്പിച്ചു.ശ്രീരാമന്റെ 18 നിശ്ചലദൃശ്യങ്ങള്‍ ഉള്‍ക്കൊള്ളുന്ന മഹത്തായ ദീപോത്സവ ഘോഷയാത്രയോടെയാണ് ആഘോഷങ്ങള്‍ ആരംഭിച്ചത്.

ഘോഷയാത്ര അയോധ്യയിലെ ഉദയ സ്‌ക്വയറില്‍ നിന്ന് ആരംഭിച്ച് രാംകഥ പാര്‍ക്കിലെത്തി. സാംസ്‌കാരിക മന്ത്രി ജയ് വീര്‍ സിംഗ് ഘോഷയാത്ര ഫ്‌ലാഗ് ഓഫ് ചെയ്തു.രാജ്യത്തെ വിവിധ സംസ്ഥാനങ്ങളില്‍ നിന്നുള്ള കലാകാരന്മാര്‍ ഘോഷയാത്രയില്‍ സംബന്ധിച്ചു.

അയോധ്യയില്‍ നിര്‍മ്മാണത്തിലിരിക്കുന്ന രാമക്ഷേത്രവും അലങ്കരിച്ചു വര്‍ണാഭമാക്കി. രാമജന്മഭൂമിയിലും ഭക്തര്‍ പ്രാര്‍ഥന നടത്തി.ശ്രീരാമന്റെ പട്ടാഭിഷേക ചടങ്ങ് മുഖ്യമന്ത്രി യോഗി ആദിത്യനാഥ് നടത്തി. അമ്പത് രാജ്യങ്ങളില്‍ നിന്നുളള നയതന്ത്രപ്രതിനിധികള്‍ ചടങ്ങില്‍ പങ്കെടുത്തു.

ലങ്ക കീഴടക്കി ശ്രീരാമന്‍ അയോധ്യയിലേക്ക് മടങ്ങിയെത്തിയപ്പോള്‍ ജനങ്ങള്‍ ദീപം തെളിച്ച് സ്വീകരിച്ചതിനെ ഈ ആഘോഷം ഓര്‍മ്മിപ്പിക്കുന്നുവെന്ന് മന്ത്രി ജയ് വീര്‍ സിംഗ് പറഞ്ഞു. അയോധ്യ ഇന്ത്യയുടെ രത്നമാണ്, ഈ ആഘോഷത്തില്‍ നിന്ന് പുറപ്പെടുന്ന സാംസ്‌കാരിക സന്ദേശം ആഗോളതലത്തില്‍ പ്രതിധ്വനിക്കും, സനാതന സംസ്‌കാരത്തിന്റെ സത്ത ലോകമെമ്പാടുമുള്ള പ്രേക്ഷകരിലേക്ക് എത്തിക്കും,’ സിംഗ് കൂട്ടിച്ചേര്‍ത്തു.

നേരത്തേ, 14 വര്‍ഷത്തെ വനവാസത്തിനുശേഷം അയോധ്യയിലേക്കുള്ള ശ്രീരാമന്റെയും ഭാര്യ സീതയുടെയും സഹോദരന്‍ ലക്ഷ്മണന്റെയും ഐതിഹാസിക മടങ്ങിവരവ് ചിത്രീകരിക്കുന്ന കലാകാരന്മാരെ വഹിച്ചുകൊണ്ടുള്ള രഥം വലിക്കുന്ന ചടങ്ങില്‍ മുഖ്യമന്ത്രി യോഗി ആദിത്യനാഥും സംസ്ഥാന ഗവര്‍ണര്‍ ആനന്ദിബെന്‍ പട്ടേലും പങ്കെടുത്തു.

#WATCH | Ayodhya, UP: CM Yogi Adityanath says, "The construction of lord Ram's temple (Ram Temple) strengthens the foundation of 'Ram Rajya', which was established in India by Prime Minister Modi in the last 9.5 years." pic.twitter.com/dM1XjR69K5

— ANI UP/Uttarakhand (@ANINewsUP) November 11, 2023

സരയൂ നദിയുടെ തീരങ്ങളില്‍ 22 ലക്ഷത്തിലധികം പരമ്പരാഗത മണ്‍വിളക്കുകള്‍ ഒരേ സമയം തെളിച്ചത് ലോക റെക്കോര്‍ഡ് സൃഷ്ടിച്ചു.