കൊച്ചി : കേരളവര്‍മ്മ കോളേജ് യൂണിയന്‍ തെരഞ്ഞെടുപ്പിലെ റീകൗണ്ടിങ്ങിനെതിരെ ഹൈക്കോടതി. യൂണിയന്‍ ചെയര്‍മാന്‍ തെരഞ്ഞെടുപ്പില്‍ കോളേജ് അധികൃതരുടെ നടപടികളില്‍ അപാകതയുണ്ട്. എന്നാല്‍ റീകൗണ്ടിങ് ആവശ്യപ്പെട്ട് എസ്എഫ്ഐ സ്ഥാനാര്‍ത്ഥി നല്‍കിയ അപേക്ഷയില്‍ കാരണം ബോധ്യപ്പടുത്തിയിരുന്നില്ലെന്നും കോടതി കോടതി നിരീക്ഷിച്ചു. തെരഞ്ഞെടുപ്പ് റദ്ദാക്കണമെന്നാവശ്യപ്പെട്ട് കെഎസ് യുവിന്റെ ചെയര്‍മാന്‍ സ്ഥാനാര്‍ത്ഥി ശ്രീക്കുട്ടന്‍ നല്‍കിയ ഹര്‍ജി പരിഗണിക്കുകയായിരുന്നു അദ്ദേഹം.
ടാബുലേഷന്‍ രേഖകള്‍ പരിശോധിച്ച കോടതി ആദ്യം വോട്ടെണ്ണിയപ്പോള്‍ കണ്ടെത്തിയ അസാധുവോട്ടുകള്‍ റീകൗണ്ടിങില്‍ പരിഗണിച്ചതായി കണ്ടെത്തുകയും അത് എങ്ങനെയാണെന്ന് ചോദിക്കുകയും ചെയ്തു. റീകൗണ്ടിങ് എന്നാല്‍ സാധുവായ വോട്ടുകള്‍ മാത്രമാണ്. നടപടിക്രമങ്ങളില്‍ അപാകതയുണ്ടായെന്നും കോടതി വിലയിരുത്തി. അസാധുവോട്ടുകള്‍ കണ്ടെത്തിയാല്‍ ഇവ മാറ്റിവച്ച് പ്രത്യേകമായി സൂക്ഷിക്കണമെന്നാണ് ചട്ടം. ഇത് റീ കൗണ്ടിങ്ങില്‍ പാലിക്കപ്പെട്ടിട്ടില്ല.
റീ കൗണ്ടിങ്ങ് ആവശ്യപ്പെട്ട് എസ്എഫ്ഐ സ്ഥാനാര്‍ത്ഥി നല്‍കിയ അപേക്ഷയില്‍ ഒരു കാരണവും വ്യക്തമായി രേഖപ്പെടുത്തിയിട്ടില്ല. ആശയക്കുഴപ്പം ഉണ്ടെന്ന് മാത്രമാണ് പരാതിയില്‍ ഉള്ളതെന്നും കോടതി പറഞ്ഞു.
കേരള വര്‍മ്മ കോളേജ് യൂണിയന്‍ ചെയര്‍മാന്‍ തെരഞ്ഞെടുപ്പില്‍ ആദ്യം വോട്ടെണ്ണിയപ്പോള്‍ കെഎസ്യു സ്ഥാനാര്‍ത്ഥിക്ക് 896 വോട്ടും എസ്എഫ്ഐ സ്ഥാനാര്‍ത്ഥിക്ക് 895 വോട്ടുമാണ് ലഭിച്ചത്. ഇതോടെ എസ്എഫ്‌ഐയുടെ ആവശ്യ പ്രകാരം റീ കൗണ്ടിങ് നടത്തിയപ്പോള്‍ എസ്എഫ്ഐ മുന്നത്തേതിനേക്കാള്‍ ഭൂരിപക്ഷത്തില്‍ വിജയിക്കുകയായിരുന്നു.
ഈ വിജയത്തില്‍ അട്ടിമറിയുണ്ടെന്ന് ചൂണ്ടിക്കാട്ടി കോളേജിലെ കെഎസ്യു ചെയര്‍മാന്‍ സ്ഥാനാര്‍ത്ഥി ശ്രീക്കുട്ടന്‍ കോടതിയെ സമീപിക്കുകയും തെരഞ്ഞെടുപ്പിന്റെ യഥാര്‍ത്ഥ ടാബുലേഷന്‍ രേഖകള്‍ ഹാജരാക്കാന്‍ ഹൈക്കോടതി നിര്‍ദ്ദേശം നല്‍കുകയുമായിരുന്നു.
അസാധു വോട്ടുകള്‍ റീ കൗണ്ടിങില്‍ സാധുവായി പരിഗണിച്ചാണ് എസ്എഫ്ഐ ജയിച്ചതെന്നാണ് ഹര്‍ജിക്കാരന്റെ വാദം. ഇത് മാര്‍ഗനിര്‍ദേശങ്ങള്‍ക്ക് വിരുദ്ധമാണെന്നും, അതിനാല്‍ വീണ്ടും തിരഞ്ഞെടുപ്പ് നടത്തണമെന്നുമാണ് ആവശ്യം.
എന്നാല്‍ യൂണിയന്‍ തെരഞ്ഞെടുപ്പിനെ കുറിച്ച് പരാതി ഉണ്ടെങ്കില്‍ കോടതിയെ അല്ല, വൈസ് ചാന്‍സിലറെയാണ് സമീപിക്കേണ്ടതെന്നാണ് സര്‍വകലാശാലയുടെ നിലപാട്. കേസില്‍ കോടതി ഇന്ന് വിധി പറഞ്ഞിട്ടില്ല. മറ്റൊരു ദിവസത്തേയ്‌ക്ക് മാറ്റി.
പ്രതികരിക്കാൻ ഇവിടെ എഴുതുക: