അടുത്ത കുറച്ച് ദിവസങ്ങളായി ലെനയാണ് സോഷ്യല് മീഡിയില് നിറഞ്ഞു നില്ക്കുന്നത്. മാനസികാരോഗ്യത്തെക്കുറിച്ചും മുന്ജന്മത്തെക്കുറിച്ചുമെല്ലാം ഇന്ത്യയുടെ പേര് ഭാരത് എന്ന് മാറ്റുന്നതിനെക്കുറിച്ചും ഒക്കെ അഭിമുഖങ്ങളില് തന്റെ നിലപാടുകള് അവതരിപ്പിക്കുകയും പ്രേക്ഷകര് അത് ഏറ്റെടുക്കുകയും ചെയ്തു. നെഗറ്റീവ് കമന്റുകള് ഉണ്ടെങ്കിലും ഏറെ ചര്ച്ചയായിരുന്നു അഭിപ്രായങ്ങള് തുറന്നു പറഞ്ഞ ലെനയുടെ പുതിയ വേഷപകര്ച്ച.
സോഷ്യല് മീഡിയിലൂടെയും അല്ലാതെയും ഏറെ ചര്ച്ചയായ വിഷയമാണ് മുന്ജന്മത്തെക്കുറിച്ചുള്ള ലെനയുടെ അഭിപ്രായങ്ങള്. ആത്മീയ പാതയിലേക്ക് തിരിഞ്ഞ ലെന അടുത്തിടെ ‘ഓട്ടോബയോഗ്രഫി ഓഫ് ഗോഡ്’ എന്ന പേരില് ഒരു പുസ്തകം പുറത്തിറക്കിയിരുന്നു. ആത്മാവിനെക്കുറിച്ചും സ്വയം തിരിച്ചറിയലിനെക്കുറിച്ചുമൊക്കെയാണ് പുസ്തകം. ഇതിന്റെ ഭാഗമായി താരം അടുത്തിടെ നല്കിയ അഭിമുഖങ്ങളെല്ലാം സോഷ്യല് മീഡിയയില് വൈറലായിരുന്നു.
കഴിഞ്ഞ ജന്മത്തില് ഞാനൊരു ബുദ്ധ സന്യാസിയായിരുന്നു. ടിബറ്റ് നേപ്പാള് അതിര്ത്തിയിലായിരുന്നു അവസാനകാലം. 63ാമത്തെ വയസ്സില് മരണപ്പെട്ടു. അതുകൊണ്ടാണ് ബുദ്ധിസ്റ്റ് സന്യാസിമാരെപ്പോലെ മുടി വെട്ടിയത്. കൂടാതെ ഹിമാലയത്തിലേക്ക് യാത്രപോയത് എന്നായിരുന്നു ലെന നേരത്തെ നല്കിയ അഭിമുഖത്തില് നേരത്തെ പറഞ്ഞത്.
ഇതിനെതിരെ ലെനയ്ക്കെതിരെ വിമര്ശനങ്ങള് കൂടിയതോടെ പരാമര്ശങ്ങളെ നിഷേധിച്ച് ഇന്ത്യന് ക്ലിനിക്കല് സൈക്കോളിസ്റ്റ് അസോസിയേഷന് കേരളാ ഘടകവും രംഗത്തെത്തി. ഇപ്പോഴിതാ സംഭവത്തില് പ്രതികരിച്ച് എത്തിയിരിക്കുകയാണ് ലെന. സൈക്കോളജിസ്റ്റ് അസോസിയേഷന് അവരുടെ ഭാഗം വ്യക്തമാക്കുകയാണ് ചെയ്തതെന്നും അതൊരു നല്ല കാര്യമാണെന്നും താരം മാധ്യമങ്ങളോട് പറഞ്ഞു.
ലെനയുടെ വാക്കുകൾ ഇങ്ങനെ: ‘ഞാനാണോ ആദ്യമായി മുൻജന്മത്തെപ്പറ്റി സംസാരിച്ചയാൾ. അറിയാൻ വേണ്ടി ചോദിക്കുകയാണ്. ഞാനാണോ ആദ്യമായി മുൻജന്മത്തെപ്പറ്റി ഈ ലോകത്ത് സംസാരിക്കുന്നത്. ഞാൻ അങ്ങനെ പറഞ്ഞേയുള്ളൂ. അതെങ്ങനെയാണെന്ന് ചോദിച്ചാൽ അതൊരു ലോങ് പ്രോസസാണ്. ചിലർക്ക് പാർട്ട് ടൈം റിഗ്രഷനിലൂടെയാകാം, ചിലർക്ക് മെഡിറ്റേഷനിലൂടെയാവാം, മറ്റുചിലർക്ക് ഗുരു കൊടുക്കുന്ന ദീക്ഷ വഴിയാകാം.
ഒരുപാട് വഴികൾ ഇതിനുണ്ട്. ഓരോരുത്തരുടേയും അനുഭവങ്ങളാണ്. ഞാൻ എന്റെ അനുഭവം പങ്കുവെച്ചുവെന്നേയുള്ളൂ. അതിൽ ഞാനൊരു കുറ്റവും കാണുന്നില്ല. ഞാനല്ല ആദ്യമായി ഇതിനെക്കുറിച്ച് സംസാരിക്കുന്നത്. മുൻജന്മം എന്നത് ഞാൻ കണ്ടുപിടിച്ച വാക്കുമല്ല. എന്നെ എന്തിനാണ് ഇത്രയും ചോദ്യം ചെയ്യുന്നത്. സർവസാധാരണമായാണ് ഞാൻ പറഞ്ഞത്. മുൻജന്മങ്ങളെക്കുറിച്ച് നമ്മൾ സിനിമകൾ കണ്ടിട്ടുണ്ട്, പുസ്തകങ്ങളും പ്രഭാഷണങ്ങളുമുണ്ട്.
സൈക്കോളജിസ്റ്റ് അസോസിയേഷൻ അവരുടെ ഭാഗം വ്യക്തമാക്കുകയാണ് ചെയ്തത്. അത് വളരെ നല്ലൊരു കാര്യമാണ്. ഞാനൊരു പ്രാക്ടീസിങ് ക്ലിനിക്കൽ സൈക്കോളജിസ്റ്റ് അല്ല, അങ്ങനെയാണെന്ന് ഞാനൊരിടത്തും പറഞ്ഞിട്ടില്ല. ഞാൻ ഒരു ഫുൾടൈം നടിയാണ്. അഭിമുഖങ്ങളിലെ ചെറിയ ഭാഗങ്ങൾ കണ്ടിട്ട് പ്രതികരിക്കുന്നവരോട് ഒന്നും പറയാനാകില്ല. മൂന്ന് മണിക്കൂർ അഭിമുഖത്തിന്റെ കുറച്ച് സെക്കന്റുകൾ കണ്ടാൽ ആർക്കും തെറ്റിദ്ധാരണ വരാം’, ലെന പറഞ്ഞു.
