ഭഗവാന് സമർപ്പിച്ചത് ആയിരം കിലോ അരി; പ്രാണ പ്രതിഷ്ഠയോട് അനുബന്ധിച്ച് അഞ്ച് ലക്ഷം ​ഗ്രാമങ്ങളിൽ പവിത്രമായ അക്ഷതം എത്തും; ഏറ്റുവാങ്ങി വിഎച്ച്പി പ്രവർത്തകർ

ലക്നൗ: ഭ​ഗവാന്റെ സന്നിധിയിൽ പൂജ ചെയ്ത അക്ഷത വിഎച്ച്പി വേളന്റിയർമാർക്ക് കൈമാറി ശ്രീരാമജന്മഭൂമി ട്രസ്റ്റ്. വരുന്ന ജനുവരി 22-ന് രാംലല്ലയുടെ പ്രാണ പ്രതിഷ്ഠ ചടങ്ങിലേക്ക് ആളുകളെ ക്ഷണിച്ചുകൊണ്ട് ജനുവരി ഒന്ന് മുതൽ ജനുവരി 15 വരെ രാജ്യത്തെ അഞ്ച് ലക്ഷം ഗ്രാമങ്ങളിൽ വിഎച്ച്‌പി പ്രവർത്തകർ പവിത്രമായ അരി വിതരണം ചെയ്യും.

രാജ്യത്തിന്റെ 45 മേഖലകളിൽ നിന്നായി 100-ലധികം വിഎച്ച്പി പ്രവർത്തകരാണ് പവിത്രമായ അക്ഷത് പൂജയിൽ പങ്കെടുത്ത് അക്ഷതം സ്വീകരിക്കാനെത്തിയത്. ഓരോ വോളന്റിയർമാർക്കും ലോഹകുടങ്ങളിൽ അഞ്ച് കിലോ അരിയാണ് നൽകിയത്. പ്രവർത്തകർ അവരവരുടെ ദേശങ്ങളിലേക്ക് ഈ അരിയുമായി മടങ്ങുമെന്ന് ക്ഷേത്ര ട്രസ്റ്റ് ജനറൽ സെക്രട്ടറി ചമ്പത് റായ് പറഞ്ഞു.

പ്രവർത്തകർ അവരുടെ ദേശത്തെത്തി പവിത്രമായ ഈ അരി മറ്റ് അരിയിലേക്ക് കൂട്ടിച്ചേർക്കും. തുടർന്ന് എല്ലാ വീടുകളിലും എത്തിക്കും. രാജ്യത്തെ അഞ്ച് ലക്ഷം ഗ്രാമങ്ങളിൽ വിതരണം ചെയ്യേണ്ടതിനാൽ അക്ഷതത്തിനൊപ്പം 100 ക്വിന്റൽ അരി കൂടി ചേർക്കുമെന്ന് വൃത്തങ്ങൾ അറിയിച്ചു. രാംലല്ലയുടെ പ്രാണ പ്രതിഷ്ഠ ചടങ്ങിലേക്ക് ഭക്തരെ ക്ഷണിക്കുന്നതിന്റെ ഭാ​ഗമാണ് വിഎച്ച്പി പ്രവർത്തകർ പവിത്രമായ അരി വിതരണം ചെയ്യുന്നത്.