തിരുവനന്തപുരം: വാഹനത്തിന്റെ പിഴ അടയ്ക്കാതെ മുങ്ങി നടക്കുന്നവര്‍ക്ക് പണി വരുന്നു.പിഴ കുടിശിക ഇല്ലാത്ത വാഹനങ്ങള്‍ക്ക് മാത്രമേ ഡിസംബര്‍ ഒന്നാം തീയതി മുതല്‍ പുക പരിശോധനാ സര്‍ട്ടിഫിക്കറ്റ് ലഭിക്കൂ.
മന്ത്രി ആന്റണി രാജുവിന്റെ അധ്യക്ഷതയില്‍ ചേര്‍ന്ന റോഡ് സുരക്ഷാ അവലോകന യോഗത്തിലാണ് തീരുമാനം.എ.ഐ. ക്യാമറ സ്ഥാപിച്ചതിന് ശേഷം അഞ്ച് മാസങ്ങളില്‍ റോഡ് അപകട മരണ നിരക്ക് കുറഞ്ഞതായി യോഗം വിലയിരുത്തി.
എ.ഐ. ക്യാമറ സ്ഥാപിച്ച ജൂണ്‍ മുതല്‍ ഒക്ടോബര്‍ 31 വരെ സംസ്ഥാനത്ത് 1263 പേരാണ് റോഡപകടങ്ങളില്‍ മരിച്ചത്.2022-ല്‍ ഇതേ കാലയളവില്‍ സംസ്ഥാനത്ത് 1669 പേരാണ് മരിച്ചത്. ഈ വര്‍ഷം സെപ്തംബറില്‍ റോഡപകടങ്ങളില്‍ 273 പേരാണ് മരിച്ചത്. എന്നാല്‍ കഴിഞ്ഞവര്‍ഷം സെപ്തംബര്‍ മാസത്തില്‍ റോഡ് അപകടങ്ങളില്‍ 365 പേരാണ് മരിച്ചത്. കഴിഞ്ഞ വര്‍ഷം ഒക്ടോബറില്‍ റോഡപകടങ്ങളില്‍ 340 പേര്‍ മരണമടഞ്ഞപ്പോള്‍ ഈ വര്‍ഷം ഒക്ടോബറില്‍ നിലവിലെ റിപ്പോര്‍ട്ട് പ്രകാരം 85 മരണങ്ങളാണ് ഉണ്ടായത്.
ക്യാമറകള്‍ പ്രവര്‍ത്തനം തുടങ്ങിയത് മുതല്‍ ഒക്ടോബര്‍ വരെ 74,32,371 ഗതാഗത നിയമലംഘനങ്ങള്‍ കണ്ടെത്തി.ഇതില്‍ 58,29,926 എണ്ണം പരിശോധിച്ച് 23,06,023 കേസുകള്‍ ഇന്റഗ്രേറ്റഡ് ട്രാന്‍സ്‌പോര്‍ട്ട് മോണിറ്ററിംഗ് സിസ്റ്റത്തില്‍ അപ്ലോഡ് ചെയ്യുകയും 2,103,801 ചെല്ലാനുകള്‍ തയ്യാറാക്കുകയും ഉണ്ടായി. 139 കോടി രൂപയിലേറെ പിഴ ചുമത്താവുന്ന നിയമലംഘനങ്ങളാണ് ഈ കാലയളവില്‍ നടന്നത്. ഏകദേശം 21.5 കോടി രൂപ ഇതിനകം പിഴയായി ലഭിച്ചു.
പ്രതികരിക്കാൻ ഇവിടെ എഴുതുക: