ന്യൂദല്‍ഹി: ശബരിമലയില്‍ വില്‍പന തടഞ്ഞതിനെ തുടര്‍ന്ന് കെട്ടിക്കിടക്കുന്ന അരവണ നശിപ്പിക്കാന്‍ സുപ്രിം കോടതി ഉത്തരവിട്ടു. ദേവസ്വം ബോര്‍ഡും സംസ്ഥാന സര്‍ക്കാരും സംയുക്തമായി അരവണ നശിപ്പിക്കണം. അരവണയുടെ വില്‍പ്പന തടഞ്ഞ കേരള ഹൈക്കോടതിയെ സുപ്രീം കോടതി രൂക്ഷമായി വിമര്‍ശിച്ചു.
കീടനാശിനി അടങ്ങിയ ഏലയ്‌ക്ക ഉപയോഗിച്ച് തയാറാക്കിയെന്ന കേസില്‍ കേരള ഹൈക്കോടതിയാണ് അരവണയുടെ വില്‍പന തടഞ്ഞത്. എന്നാല്‍ അരവണ ഭക്ഷ്യ യോഗ്യമാണെന്ന് പിന്നീട് പരിശോധന ഫലം വന്നെങ്കിലും അപ്പോഴേക്കും കാലാവധി കഴിഞ്ഞിരുന്നു. ദേവസ്വം ബോര്‍ഡിന്റെ ഹര്‍ജിയിലാണ് സുപ്രീം കോടതി ഇപ്പോള്‍ അരവണ നശിപ്പിക്കാന്‍ നിര്‍ദ്ദേശം നല്‍കിയത്.
കെട്ടിക്കിടക്കുന്നത് 6.65 ലക്ഷം ടിന്‍ അരവണയാണ് . ഏതാണ്ട് ഏഴ് കോടി രൂപയുടെ നഷ്ടം ഇത് മൂലം തിരുവിതാംകൂര്‍ ദേവസ്വം ബോര്‍ഡിന് ഉണ്ടായെന്ന് ബോര്‍ഡിന് വേണ്ടി ഹാജരായ സീനിയര്‍ അഭിഭാഷകന്‍ വി. ഗിരിയും അഭിഭാഷകന്‍ പി.എസ്. സുധീറും സുപ്രീം കോടതിയെ അറിയിച്ചു. .
വാണിജ്യ താത്പര്യമുള്ള വിഷയങ്ങളില്‍ ഹൈക്കോടതി ഇടപെട്ടത് ശരിയായില്ലന്ന് ജസ്റ്റിസുമാരായ എ.എസ്. ബൊപ്പണ്ണ, പി.എസ്. നരസിംഹ എന്നിവര്‍ ഉള്‍പ്പെട്ട ബെഞ്ച് നിരീക്ഷിച്ചു. ഏലയ്‌ക്കയുടെ കരാര്‍ കിട്ടാത്ത വ്യക്തി നല്‍കിയ ഹര്‍ജിയുടെ അടിസ്ഥാനത്തിലായിരുന്നു ഹൈക്കോടതി ഇടപെടല്‍ എന്നും സുപ്രീം കോടതി ചൂണ്ടിക്കാട്ടി.
രാജ്യത്തെ ആരാധനാലയങ്ങളില്‍ വിതരണം ചെയ്യുന്ന പ്രസാദം എല്ലാം ഭക്ഷ്യ സുരക്ഷാപരിശാധനയ്‌ക്ക് വിധേയമാക്കാന്‍ കഴിയില്ലെന്ന് കേന്ദ്രം കോടതിയെ അറിയിച്ചു. ഇക്കാര്യത്തില്‍ മാര്‍ഗരേഖ പുറത്തിറക്കണമെന്ന കേന്ദ്ര സര്‍ക്കാരിന്റെ ആവശ്യം കോടതി അംഗീകരിച്ചു.
പ്രതികരിക്കാൻ ഇവിടെ എഴുതുക: