കോട്ടയം: അയര്ക്കുന്നത്ത് പതിനഞ്ചുകാരിയെ പ്രണയം നടിച്ചു തട്ടിക്കൊണ്ടുപോയി പീഡിപ്പിച്ച ശേഷം കൊലപ്പെടുത്തിയ കേസില് പ്രതിക്ക് 20 വര്ഷം തടവുശിക്ഷ. മണര്കാട് മാലംകുഴി നാഗനിലത്തില് അജേഷ്(39) കുറ്റക്കാരനാണെന്ന് കോടതി കഴിഞ്ഞ ദിവസം വിധിച്ചിരുന്നു.
പോക്സോ കേസുകള് പരിഗണിക്കുന്ന അഡീഷണല് ജില്ലാ കോടതി ജഡ്ജി സാനു എസ്. പണിക്കരാണ് വിധി പ്രസ്താവിച്ചത്. 20 വര്ഷം അധിക തടവും ജീവപര്യന്തവും ഉള്പ്പടെ മുപ്പത്തിയഞ്ചര വര്ഷത്തേക്കാണ് ശിക്ഷയെങ്കിലും ഒരുമിച്ച് അനുഭവിച്ചാല് മതി. രണ്ടര ലക്ഷം രൂപ പിഴയും അടയ്ക്കണം.
പീഡനം, അന്യായമായി തടങ്കലില് പാര്പ്പിക്കല്, കൊലപാതകം എന്നീ കുറ്റങ്ങള് തെളിയിക്കാന് പ്രോസിക്യൂഷന് സാധിച്ചു. പ്രോസിക്യൂഷന് വേണ്ടി സ്പെഷല് പബ്ലിക് പ്രോസിക്യൂട്ടര് എം.എന്. പുഷ്കരന് ഹാജരായി.
2019 ജനുവരി 17 ന് ആണ് കേസിനാസ്പദമായ സംഭവം. അയര്ക്കുന്നത്ത് ഹോളോബ്രിക്സ് സ്ഥാപനത്തിലെ ടിപ്പര് ലോറി ഡ്രൈവറായിരുന്നു അജേഷ്. തൈക്കൂട്ടം സ്വദേശിനിയുമായി സൗഹൃദത്തിലായ പ്രതി പെണ്കുട്ടിയെ താമസസ്ഥലത്തേക്ക് വിളിച്ചുവരുത്തി പീഡിപ്പിച്ചു. തുടര്ന്ന് കഴുത്ത് ഞെരിച്ച് കൊലപ്പെടുത്തി. മൃതദേഹം സമീപത്ത് മറവുചെയ്തു. അയര്ക്കുന്നം പോലീസാണ് കേസ് അന്വേഷിച്ച് കുറ്റപത്രം സമര്പ്പിച്ചത്.
