കോഴിക്കോട് : നിലമ്പൂരില് പി.വി. അന്വര് എംഎല്എ അനധികൃതമായി കൈവശം വെച്ചിരുന്ന ഭൂമി കണ്ടുകെട്ടാന് നടപടി തുടങ്ങി. കൂടരഞ്ഞി വില്ലേജില് അന്വര് കൈവശം വെച്ചിരിക്കുന്ന 90.3 സെന്റ് ഭൂമി കണ്ടുകെട്ടാനാണ് നീക്കം. വിവിധ താലൂക്കുകളിലായി 6.24 ഏക്കര് ഭൂമിയാണ് പി.വി. അന്വര് കൈവശം വെച്ചിരിക്കുന്നത്.
അന്വര് കൈവശപ്പെടുത്തിയിരിക്കുന്ന ഭൂമി സ്വമേധയാ സര്ക്കാരിലേക്ക് വി്ട്ടു നല്കാനാണ് താമരശ്ശേരി താലൂക്ക് ലാന്ഡ് ബോര്ഡ് ഉത്തരവിട്ടിരുന്നത്. കഴിഞ്ഞമാസം 26ന് ഇതിന്റെ സമയ പരിധി അവസാനിച്ചിട്ടും ഭൂമി തിരികെ നല്കാന് അന്വര് തയ്യാറാകാതെ വന്നതോടെയാണ് തഹസില്ദാരുടെ നേതൃത്വത്തില് ഭൂമി ഏറ്റെടുക്കല് നടപടി തുടങ്ങിയത്.
ഇതിന്റെ ഭാഗമായി കൂടരഞ്ഞി പഞ്ചായത്തിലെ കക്കാടം പൊയിലില് അന്വര് കൈവശം വെച്ചിരിക്കുന്ന ഭൂമിയില് താമരശ്ശേരി താലൂക്ക് ഭൂരേഖാ വിഭാഗം തഹസില്ദാര് കെ ഹരീഷിന്റെ നേതൃത്വത്തില് പ്രാഥമിക പരിശോധന നടത്തി. ഈ ഭൂമിയുമായി അതിര്ത്തി പങ്കിടുന്ന സ്ഥലത്തിന്റെ ഉടമകള്ക്ക് ഇനി നോട്ടീസ് അയക്കും. ഇവരുടെ ഭൂരേഖകളുമായി ഒത്തു നോക്കിയ ശേഷം അതിര്ത്തി നിര്ണ്ണയിച്ച് കല്ലിടും.
സര്വേ വേഗത്തില് പൂര്ത്തിയാക്കാനാണ് ഉദ്യോഗസ്ഥര്ക്ക് ലഭിച്ചിരിക്കുന്ന നിര്ദേശം. കക്കാടം പൊയിലില് 90.3 സെന്റ് ഭൂമിയാണ് സര്ക്കാരിലേക്ക് കണ്ടുകെട്ടേണ്ടത്. ഇതിന് പുറമേ മലപ്പുറം ജില്ലയിലെ ഏറനാട് താലൂക്കിലും പാലക്കാട് ജില്ലയിലെ ആലത്തൂര് താലൂക്കിലും കണ്ടുകെട്ടേണ്ട മിച്ച ഭൂമിയുണ്ട്. ഇവിടെ സര്വേ തുടങ്ങിയിട്ടില്ല. ഇവിടേയും സര്വ്വേ പൂര്്ത്തിയാത്തി നടപടി കൈക്കൊള്ളും.
