തിരുവനന്തപുരം: സാഹിത്യത്തിലെ സമഗ്ര സംഭവനയ്ക്കുളള സംസ്ഥാന സര്ക്കാരിന്റെ പരമോന്നത സാഹിത്യ പുരസ്കാരമായ എഴുത്തച്ഛന് പുരസ്കാരം ഭാഷാ ചരിത്ര പണ്ഡിതനും എഴുത്തുകാരനുമായ ഡോ. എസ്.കെ വസന്തന്. അഞ്ച് ലക്ഷം രൂപയും പ്രശസ്തിപത്രവും ഫലകവുമടങ്ങുന്നതാണ് പുരസ്കാരം.
മികച്ച അധ്യാപകന്, വാഗ്മി, ഗവേഷണ മാര്ഗദര്ശി തുടങ്ങിയ നിലകളിലുള്ള വസന്തന്റെ സംഭാവനകള് കൂടി കണക്കിലെടുത്താണ് എഴുത്തച്ഛന് പുരസ്കാരത്തിന് 89-ാം വയസില് അദ്ദേഹത്തെ തെരഞ്ഞെടുത്തത്. നോവലിസ്റ്റും കഥാകൃത്തും ഉപന്യാസകാരനും ചരിത്രഗവേഷകനുമായ എസ്.കെ വസന്തന് വിവിധ വിഷയങ്ങളില് അനേകം പുസ്തകങ്ങളുടെ രചയിതാവാണ്.
ശാസ്ത്രസാഹിത്യത്തിന് കേരള സാഹിത്യ അക്കാദമി അവാര്ഡും സമഗ്രസംഭാവനയ്ക്കുള്ള പുരസ്കാരവും നേടിയിട്ടുണ്ട്. ഡോ. അനില് വള്ളത്തോള് ചെയര്മാനും ഡോ. ധര്മരാജ് അടാട്ട്, ഡോ. ഖദീജ മുംതാസ്, ഡോ. പി.സോമന്, മെമ്പര് സെക്രട്ടറി സി.പി അബൂബക്കര് എന്നിവര് അംഗങ്ങളായ സമിതിയുടേതാണ് പുരസ്കാര നിര്ണയം.
