തിരുവനന്തപുരം: ഹമാസ് ഭീകരവാദികള്‍ക്ക് വേണ്ടിയാണ് കേന്ദ്ര മന്ത്രി രാജീവ് ചന്ദ്രശേഖറിനെതിരെ സംസ്ഥാന സര്‍ക്കാര്‍ കേസെടുത്തതെന്നും മുഖ്യമന്ത്രി പിണറായി വിജയന്‍ ആഗോള മതഭീകര സംഘടനയായ ഹമാസിന്റെ വക്താവിനെ പോലെയാണ് പെരുമാറുന്നതെന്നും ബിജെപി ദേശീയ നിര്‍വ്വാഹക സമിതി അംഗം പി.കെ. കൃഷ്ണദാസ്.
പിണറായി സര്‍ക്കാര്‍ പൂര്‍ണമായും മതഭീകരവാദികള്‍ക്കും തീവ്രവാദികള്‍ക്കും അടിമപ്പെട്ടിരിക്കുന്നു എന്നതിന്റെ ഏറ്റവും ഒടുവിലത്തെ ഉദാഹരണമാണിത്. 2024ലെ ലോക്‌സഭാ തെരഞ്ഞെടുപ്പ് മുന്നില്‍കണ്ട് മതഭീകരവാദികളെ പ്രീതിപ്പെടുത്താനും പ്രീണിപ്പിക്കാനും വേണ്ടിയാണ് ഈ നടപടി. ഇന്ത്യയിലാകമാനം പ്രവര്‍ത്തിക്കുന്ന ഭീകരസംഘടനകളോട് എക്കാലവും കമ്മ്യൂണിസ്റ്റ് നിലപാട് ഇതു തന്നെയായിരുന്നു.
1600 അധികം നിരപരാധികളായ ഇസ്രായേലുകളെ കൊലചെയ്ത ഹമാസ് ഭീകരവാദികളെ മുഖ്യമന്ത്രിയും സിപിഎം നേതൃത്വവും പിന്തുണയ്‌ക്കാന്‍ തയ്യാറായതോടെയാണ് കേരളത്തില്‍ ഉടനീളം മതഭീകര സംഘടനകള്‍ ഹമാസിന് അനുകൂലമായുള്ള പ്രചാരണം ഏറ്റെടുത്തത്. ഇത് സമൂഹത്തില്‍ തെറ്റായ സന്ദേശമാണ് നല്‍കുന്നത്.
സംസ്ഥാനത്തിന് ഉള്ളില്‍ വിഭാഗീയതയും മതപരമായ വിഭജനവുമാണ് മുഖ്യമന്ത്രി സൃഷ്ടിക്കുന്നത്. അതിനെതിരെ ശബ്ദിക്കുന്നവരെ ജാമ്യമില്ലാ വകുപ്പ് ചേര്‍ത്ത് കള്ളക്കേസില്‍ കുടുക്കുന്നതും പ്രതിഷേധാര്‍ഹമാണ്.
പിണറായിയുടെ പ്രസംഗങ്ങളും പ്രവര്‍ത്തനങ്ങളും കാളകൂടവിഷം വമിക്കുന്നതാണ്. ഇത് ഭീകരവാദികളെ സന്തോഷിപ്പിക്കാന്‍ സാധിക്കുമെങ്കിലും രാഷ്‌ട്രത്തിന്റെ അഖണ്ഡതയ്‌ക്ക് എതിരാണ്. ഇതിനെതിരെ മുഴുവന്‍ രാജ്യസ്‌നേഹികളും പ്രതിഷേധിക്കണമെന്ന് അദ്ദേഹം പ്രസ്താവിച്ചു.
പ്രതികരിക്കാൻ ഇവിടെ എഴുതുക: