അക്കാദമിക് രംഗത്തും അടിസ്ഥാന സൗകര്യ വികസന മേഖലയിലും മുന്നേറുന്നതിന് നിരവധി പദ്ധതികള് നടപ്പിലാക്കുക വഴി മൂന്ന് വര്ഷം കേരള കേന്ദ്രസര്വ്വകലാശാലയുടെ സര്വ്വതോമുഖമായ വികസന പ്രവര്ത്തനങ്ങള്ക്ക് നേതൃത്വം നല്കിയ വ്യക്തിയാണ് പ്രൊഫ. വെങ്കടേശ്വര്ലു. വിദ്യാര്ത്ഥികളുടെ സര്ഗാത്മക കഴിവുകള് പരിപോഷിപ്പിക്കുന്നതിനുള്ള ‘പ്രേരണ’, സിവില് സര്വ്വീസ് അക്കാദമി, പിന്നാക്ക മേഖലകള്ക്ക് ആശ്വാസമായി മാറിയ ‘മിഷന് ഫോര് ഹെല്ത്ത് ആന്ഡ് ഡവലപ്മെന്റ്’, ക്യാംപസിന്റെ ഹരിതവത്കരണത്തിനുള്ള വിവിധ പദ്ധതികള് എന്നിവ അദ്ദേഹത്തിന്റെ ദീര്ഘ വീക്ഷണത്തിന്റെ പ്രതിഫലനങ്ങളായിരുന്നു. കൊവിഡ് കാലത്ത് അദ്ദേഹത്തിന്റെ നിര്ദ്ദേശത്തില് സര്വ്വകലാശാല ലാബില് പരിശോധനകള് ആരംഭിക്കുക വഴി സമൂഹത്തിന് ആശ്വാസം പകര്ന്നു. നാല് ലക്ഷത്തിലേറെ കൊവിഡ് പരിശോധനകളാണ് സര്വ്വകലാശാലയില് നടന്നത്. വിവിധ മേഖലകളില് മാതൃകകള് തീര്ത്തവര്ക്ക് ഓണററി ഡോക്ടറേറ്റ് നല്കി ആദരിക്കുന്നതിനും തുടക്കമിട്ടു. പി.ടി. ഉഷ ആദ്യ ഓണററി ഡോക്ടറേറ്റ് ഏറ്റുവാങ്ങി.
നാക് പരിശോധനയില് എ ഗ്രേഡ് നേടിയും ഇക്കാലയളവില് സര്വ്വകലാശാല തിളങ്ങി. നൊബേല് ജേതാക്കളെ ഉള്പ്പെടെ പങ്കെടുപ്പിച്ച് പ്രഭാഷണ പരമ്പരയും ആരംഭിച്ചു. സെന്ട്രല് ഇന്സ്ട്രുമെന്റേഷന് ഫെസിലിറ്റി (സിഐഎഫ്) യാഥാര്ത്ഥ്യമാക്കുന്നതിനും തുടക്കം കുറിച്ചു. നാല് വര്ഷ ഇന്റഗ്രേറ്റഡ് ടീച്ചര് എജ്യൂക്കേഷന് പ്രോഗ്രാം ആരംഭിക്കുന്നതിനും സര്വ്വകലാശാല സാക്ഷ്യം വഹിച്ചു. ഡോ. എ.പി.ജെ. അബ്ദുള് കലാം സെന്റര് ഫോര് എക്സ്റ്റന്ഷന് ആക്ടിവിറ്റീസ്, ഇ. ശ്രീധരന് സെന്റര് ഫോര് ലൈഫ് സ്കില്സ് എജ്യൂക്കേഷന് എന്നിവ ആരംഭിച്ചു. ഹോസ്റ്റലുകള്, മെഡിക്കല് സെന്ററിന് പുതിയ ആസ്ഥാനം തുടങ്ങിയവ നിര്മ്മിച്ചു. പത്ത് പുസ്തകങ്ങളും അദ്ദേഹത്തിന്റേതായുണ്ട്. 2010 ല് മികച്ച അധ്യാപകനുള്ള ആന്ധ്രാപ്രദേശ് സംസ്ഥാന അവാര്ഡ് നേടി. ഒസ്മാനിയ യൂണിവേഴ്സിറ്റിയുടെ സെന്റിനറി ആഘോഷങ്ങളുടെ സ്പെഷ്യല് ഓഫീസര്, പ്രൊഫ. ജി. രാമറെഡ്ഡി സെന്റര് ഫോര് ഡിസ്റ്റന്സ് എജ്യൂക്കേഷന് ഡയറക്ടര്, കോളേജ് ഡവലപ്മെന്റ് കൗണ്സില് ഡീന്, ഫാക്കല്റ്റി ഓഫ് കൊമേഴ്സ് ഡീന്, കൊമേഴ്സ് ഡിപ്പാര്ട്ട്മെന്റ് അധ്യക്ഷന്, ഒസ്മാനിയ യൂണിവേഴ്സിറ്റി കൊമേഴ്സ് ബോര്ഡ് ഓഫ് സ്റ്റഡീസ് അംഗം എന്നീ ചുമതലകള് വഹിച്ചു. ഇന്ത്യന് കൊമേഴ്സ് അസോസിയേഷന് പ്രസിഡണ്ടായും പ്രവര്ത്തിച്ചു. ഹൈദരാബാദ് നാഷണല് അക്കാദമി ഓഫ് ഡവലപ്മെന്റ് മുന് ജോയിന്റ് ഡയറക്ടറായിരുന്നു.
അനുശോചിച്ചു
പ്രൊഫ. എച്ച്. വെങ്കടേശ്വര്ലുവിന്റെ നിര്യാണത്തില് സര്വ്വകലാശാല അനുശോചിച്ചു. സര്വ്വകലാശാലക്കും അക്കാദമിക് സമൂഹത്തിനും തീരാനഷ്ടമാണ് വിയോഗമെന്ന് വൈസ് ചാന്സലര് ഇന് ചാര്ജ് പ്രൊഫ. കെ.സി. ബൈജു പറഞ്ഞു. അദ്ദേഹത്തിന്റെ അചഞ്ചലമായ അര്പ്പണ മനോഭാവം സര്വ്വകലാശാലയെ മികവിലേക്ക് നയിച്ചു. അദ്ദേഹത്തിന്റെ നേതൃത്വവും സ്ഥാപനത്തോടുളള പ്രതിബദ്ധതയും അക്കാദമിക് സമൂഹം എക്കാലവും സ്മരിക്കും. അദ്ദേഹത്തിന്റെ കുടുംബാംഗങ്ങള്ക്കൊപ്പം പ്രാര്ത്ഥനയോടെ ദു:ഖത്തില് പങ്കുചേരുന്നുവെന്ന് അനുശോചന സന്ദേശത്തില് പ്രൊഫ. കെ.സി. ബൈജു പറഞ്ഞു.
ജന്മഭൂമി ഓണ്ലൈന്