തൃശ്ശൂര്: കരുവന്നൂര് സഹ. ബാങ്കുതട്ടിപ്പുകേസില് പ്രതികളുടെ ജാമ്യാപേക്ഷ കോടതി തള്ളി. റിമാന്ഡിലുള്ള സിപിഎം നേതാവും വടക്കാഞ്ചേരി നഗരസഭ സ്റ്റാന്ഡിങ് കമ്മിറ്റി ചെയര്മാനുമായ പി.ആര്. അരവിന്ദാക്ഷന്റെയും ബാങ്കിലെ മുന് സീനിയര് അക്കൗണ്ടന്റ് സി.കെ ജില്സിന്റെയും ജാമ്യാപേക്ഷയാണ് വിചാരണക്കോടതി തള്ളിയത്. പ്രതികള്ക്കെതിരേ വ്യക്തമായ തെളിവുകളുണ്ടെന്നും സ്വത്തു സംബന്ധിച്ച പ്രതികളുടെ വിശദീകരണം തൃപ്തികരമല്ലെന്നും കോടതി നിരീക്ഷിച്ചു. എറണാകുളം പിഎംഎല്എ കോടതിയുടേതാണ് വിധി.
കേസില് മൂന്നാം പ്രതിയായ പി.ആര്. അരവിന്ദാക്ഷന് കള്ളപ്പണം വെളുപ്പിച്ചതായാണ് ഇ ഡി കണ്ടെത്തല്. മുഖ്യപ്രതി പി. സതീഷ് കുമാറുമായി അരവിന്ദാക്ഷന് നടത്തിയ സാമ്പത്തിക ഇടപാടുകളുടെ രേഖകളും ഇതു തെളിയിക്കുന്ന ഫോണ് സംഭാഷണങ്ങളും കോടതിയില് ഇ ഡി ഹാജരാക്കിയിരുന്നു. അന്വേഷണം തുടരുന്ന സാഹചര്യത്തില് പ്രതികള്ക്ക് ജാമ്യം നല്കരുതെന്ന് ഇ ഡി ആവശ്യപ്പെട്ടു. കേസില് നാലാം പ്രതിയാണ് സി.കെ. ജില്സ്.
എന്നാല്, കള്ളപ്പണം വെളുപ്പിച്ചെന്ന വാദം തെറ്റാണെന്നും തന്റെ അക്കൗണ്ടിലൂടെ നടത്തിയ സാമ്പത്തിക ഇടപാട് ക്വാറി, ഹോട്ടല് ബിസിനസ് നടന്ന കാലത്തേതാണെന്നുമാണ് അരവിന്ദാക്ഷന് കോടതിയെ അറിയിച്ചത്. സതീഷ്കുമാറിന്റെ മുന് ഡ്രൈവറുമായി അടുപ്പം ഉണ്ടായിരുന്നതായും അരവിന്ദാക്ഷന് സമ്മതിച്ചു. കേസില് നിര്ണായക സാക്ഷിയാണ് ഡ്രൈവര്. ഇരുവരും അറസ്റ്റിലായിട്ട് ഒരു മാസം പിന്നിട്ടു. സപ്തം. 26നാണ് ഇ ഡി അരവിന്ദാക്ഷനെ വീട്ടിലെത്തി അറസ്റ്റ് ചെയ്തത്.
:
