ഭക്ഷ്യവിഷബാധ; ആറ് പേർ കൂടി ചികിത്സ തേടി

കൊച്ചി: കോട്ടയം സ്വദേശി രാഹുൽ മരിച്ചതിന് പിന്നാലെ കൂടുതൽ പേർ ഭക്ഷ്യവിഷബാധയേറ്റ് ലക്ഷണങ്ങളുമായി ചികിത്സതേടി. ആറ് പേർ കൂടി വിവിധ ആശുപത്രികളിലായി ചികിത്സ തേടിയിട്ടുണ്ട്. തൃക്കാക്കര നഗരസഭാ മെഡിക്കൽ ഓഫീസർ ജില്ലാ ഓഫീസർക്ക് ഇതിന്റെ റിപ്പോർട്ട് നൽകിയിട്ടുണ്ട്.

ഹോട്ടലിൽ നിന്നും ഓൺലൈൻ മുഖേന വാങ്ങിക്കഴിച്ച ഷവർമയിൽ നിന്നും ഭക്ഷ്യവിഷബാധയേറ്റതായി ബന്ധുക്കൾ പരാതിപ്പെട്ടു. ഇതിന് പിന്നാലെയാണ് കോട്ടയം സ്വദേശിയായ രാഹുൽ ഡി നായർ മരിച്ചത്. ഹോട്ടലിൽ നിന്നും ഷവർമയും അൽഫാമും കഴിച്ച് ആറ് പേർ കൂടി ചികിത്സ തേടിയിരുന്നു. വയറിളക്കം, ഛർദ്ദി എന്നിങ്ങനെ വിവിധ ലക്ഷണങ്ങളോടെയാണ് ചികിത്സ തേടിയിരിക്കുന്നത്.

രാഹുൽ ചികിത്സ തേടിയ അതേ ആശുപത്രിയിൽ സമാന ലക്ഷണങ്ങളോടെ മറ്റ് രണ്ട് പേർ കൂടി ചികിത്സ തേടിയിരുന്നതായി ആശുപത്രി അധികൃതർ റിപ്പോർട്ട് നൽകിയിട്ടുണ്ട്.