തൃക്കാക്കര: ഷവര്മ കഴിച്ചതിനെ തുടര്ന്ന് ഭക്ഷ്യവിഷബാധയേറ്റ് ചികത്സയിലിരിക്കെ മരിച്ച കാക്കനാട് സെസിലെ എസ്എഫ്ഒ കമ്പനിയിലെ കരാര് ജീവനക്കാരനായ കോട്ടയം സ്വദേശി രാഹുല് ഡി. നായരുടെ (24) രാസപരിശോധനാ ഫലം കാത്ത് അന്വേഷണ സംഘം. കാക്കനാട് റീജണല് കെമിക്കല് ലാബിലാണ് പരിശോധന നടത്തുന്നത്. പരിശോധനാ ഫലം ലഭിക്കുമെന്ന പ്രതീക്ഷയിലാണ് നാളെ അന്വേഷണ സംഘം.
പോസ്റ്റ്്മോര്ട്ടത്തിനു ശേഷം മൃതദേഹം ബന്ധുക്കള്ക്ക് വിട്ടുനല്കി. കഴിഞ്ഞ 18ന് കാക്കനാട് മാവേലിപുരത്തെ ഹോട്ടലില് നിന്നാണ്് ഓണ്ലൈനായി ഷവര്മ വാങ്ങി കഴിച്ചത്. പീന്നീട് ഛര്ദിയും വയറിളക്കവും ഉണ്ടായതിനെത്തുടര്ന്ന് സമീപത്തുള്ള ആശുപത്രിയില് ചികിത്സ തേടി വീട്ടിലേക്ക് മടങ്ങി. ആരോഗ്യനില വീണ്ടും ഗുരുതരമായതിനെ തുടര്ന്ന് ഞായറാഴ്ച രാവിലെ കാക്കനാട് പ്രാഥമികാരോഗ്യ കേന്ദ്രത്തില് ചികിത്സ തേടി.
അവിടെ നിന്നും കാക്കനാട്ടെ സണ്റൈസ് ആശുപത്രിയില് എത്തിക്കുകയായിരുന്നു. യുവാവിന്റെ ശരീരത്തില് അണുബാധയെത്തുടര്ന്ന് ആന്തരിക അവയവങ്ങള് പ്രവര്ത്തനരഹിതമായിരുന്നു. ബുധനാഴ്ച ഉച്ചയ്ക്കാണ് മരണം സംഭവിച്ചത്.
