മല്ലപ്പള്ളി: കുടുംബപ്രശ്‌നങ്ങളെ തുടര്‍ന്ന് വേര്‍പിരിഞ്ഞ് താമസിക്കുന്ന ഭാര്യയെ ഭര്‍ത്താവ് വീട്ടിലെത്തി വെട്ടികൊലപ്പെടുത്തി. കുന്നന്താനം സ്മിത ഭവനില്‍ ശ്രീജ ജി. മേനോന്‍ (38) ആണ് ഭര്‍ത്താവിന്റെ ആക്രമണത്തില്‍ കൊല്ലപ്പെട്ടത്. ശ്രീജയുടെ ഭര്‍ത്താവ് വട്ടശ്ശേരിയില്‍ വേണുക്കുട്ടന്‍ നായരെ (48) പിന്നീട് ആത്മഹത്യ ചെയ്ത നിലയില്‍ കണ്ടെത്തി.
ഇരുവരും എട്ടു മാസമായി വേര്‍പിരിഞ്ഞ് താമസിക്കുകയായിരുന്നവെന്ന് കുടുംബവുമായി അടുപ്പമുള്ളവര്‍ പറയുന്നു. വ്യാഴാഴ്ച രാവിലെ എട്ടു മണിയോടെയാണ് വേണുക്കുട്ടന്‍ ശ്രീജയുടെ വീട്ടിലെത്തിയത്. വെട്ടും കുത്തേറ്റ് ശ്രീജ തറയില്‍ വീണതോടെ വേണുക്കുട്ടന്‍ നായര്‍ അടുത്ത മുറിയിലേക്ക് ഓടിക്കയറുകയായിരുന്നു.
നിലവിളി കേട്ട് ബന്ധുക്കളെത്തി ശ്രീജയെ ആശുപത്രിയില്‍ എത്തിച്ചെങ്കിലും രക്ഷിക്കാനായില്ല. തുടര്‍ന്ന് കഴുത്തിലും വയറിലും മുറിവേറ്റ നിലയില്‍ വേണുക്കുട്ടന്‍ നായരെ കണ്ടെത്തുകയായിരുന്നു. ഭാര്യയെ ആക്രമിച്ചശേഷം ഇയാള്‍ സ്വയം മുറിവേല്‍പ്പിച്ച് ജീവനൊടുക്കിയതാണെന്ന് സംശയിക്കുന്നതായി പോലീസ് പറഞ്ഞു.
എന്നാല്‍, ഇക്കാര്യത്തില്‍ വ്യക്തത വരാനുണ്ടെന്നും കൂടുതല്‍ അന്വേഷണം നടക്കുകയാണെന്നും പോലീസ് പ്രതികരിച്ചു. സംഭവത്തില്‍ കീഴ്‌വായ്പൂര്‍ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. ഇരുവരേയും വഴക്ക് തീര്‍ത്ത് അനുനയിപ്പിക്കാന്‍ ബന്ധുക്കള്‍ ശ്രമിച്ചിരുന്നെങ്കിലും നടന്നില്ല. ഒന്നുരണ്ടു തവണ വേണുക്കുട്ടന്‍ നായര്‍ ശ്രീജയെ കാണാന്‍ ശ്രമിച്ചിരുന്നതായും എന്നാല്‍ ശ്രീജ കൂടിക്കാഴ്ചയ്‌ക്ക് അനുവദിച്ചിരുന്നില്ലെന്നും പറയുന്നു. ഗള്‍ഫില്‍ ജോലിയുണ്ടായിരുന്ന വേണു കുറച്ചുനാളായി നാട്ടിലുണ്ട്. ശ്രീജ തെങ്ങണയില്‍ സ്വകാര്യ ധനകാര്യ സ്ഥാപനത്തിലെ ജീവനക്കാരിയായിരുന്നു.
ദമ്പതിമാര്‍ക്ക് ആറാം ക്ലാസില്‍ പഠിക്കുന്ന ഒരു മകളുണ്ട്. മകള്‍ അമ്മയോടൊപ്പമായിരുന്നു താമസം.
പ്രതികരിക്കാൻ ഇവിടെ എഴുതുക: