പീരുമേട്(ഇടുക്കി): ഏലപ്പാറ കൊച്ചുകരിന്തരുവി പുഴയിലെ കയത്തില് കാണാതായ തിരുവനന്തപുരം കല്ലമ്പലം നിബിന് മന്സിലില് ഫസിലിന്റെ മകന് നിബിന്റെ(20) മൃതദേഹം കണ്ടെത്തി. ചൊവ്വാഴ്ചയാണ് അനുജനെ രക്ഷിക്കുന്നതിനിടെ നിബിന് അപകടത്തില്പ്പെട്ടത്.
വിനോദ സഞ്ചാര സംഘം ഗവി സന്ദര്ശിച്ച് വൈകിട്ടാണ് ഏലപ്പാറയിലെത്തിയത്. കൊച്ചുകരിന്തരുവിയിലെ റിസോര്ട്ടില് എത്തിയ ശേഷം സംഘാംഗങ്ങള് പുഴയില് കുളിക്കാനിറങ്ങി. അനുജന് നിതിന് ഒഴുക്കില്പ്പെട്ടത് കണ്ട് രക്ഷപ്പെടുത്താന് ഇറങ്ങിയതാണ് നിബിന്. ബഹളം കേട്ട് ഓടിയെത്തിയ നാട്ടുകാരനായ വെട്ടുകല്ലാംകുഴി ടോമി രണ്ടുപേരെയും രക്ഷപ്പെടുത്തി. നിബിനെ പാറയില് ഇരുത്തിയശേഷം നിതിനെ മുകളിലേക്ക് കയറ്റുന്നതിനിടെ നിബിന് കാല് വഴുതി വീണ്ടും ഒഴുക്കില്പ്പെട്ട് കയത്തില് അകപ്പെടുകയായിരുന്നു. നാട്ടുകാര് ഏറെ ശ്രമിച്ചെങ്കിലും നിബിനെ രക്ഷിക്കാനായില്ല.
പീരുമേട്ടില് നിന്ന് അഗ്നിരക്ഷാസേനയും വാഗമണ് പോലീസും സ്ഥലത്തെത്തി തെരച്ചില് നടത്തിയെങ്കിലും ഫലമുണ്ടായില്ല. പുലര്ച്ചെ ഈരാറ്റുപേട്ട നന്മക്കൂട്ടം റാപ്പിഡ് റസ്ക്യൂ ടീം കൊച്ചുകരിന്തിരിയില് എത്തി നടത്തിയ തെരച്ചിലിലാണ് ആറ് മണിയോടെ മൃതദേഹം കണ്ടെത്തിയത്. തുടര്ന്ന് മൃതദ്ദേഹം പീരുമേട് താലൂക്ക് ആശുപത്രിയില് എത്തിച്ചു. പോസ്റ്റുമോര്ട്ടത്തിന് ശേഷം ബന്ധുക്കള്ക്ക് വിട്ടുനല്കി.
