അഹമ്മദാബാദ്: വാഗ് ബക്രി ടീ ഗ്രൂപ്പിന്റെ എക്‌സിക്യൂട്ടീവ് ഡയറക്ടറായ പരാഗ് ദേശായി അന്തരിച്ചു. കഴിഞ്ഞ ഞായറാഴ്ചയാണ് അദേഹത്തെ തെരുവ് നായ ആക്രമണത്തെ തുടര്‍ന്ന് ആശുപത്രിയില്‍ പ്രവേശിപ്പിച്ചത്. 49 വയസ്സായിരുന്നു. ഒരു ആഴ്ചയുടെ ചികിത്സയ്‌ക്ക് പിന്നാലെയാണ് പ്രമുഖ വ്യവസായി മരണത്തിന് കീഴടങ്ങിയത്.
ഒക്ടോബര്‍ 15നാണ് പരാഗ് ദേശായിയെ തെരുവുനായകള്‍ ആക്രമിച്ചത്. പ്രഭാത നടത്തത്തിന് ഇറങ്ങിയപ്പോള്‍ വസതിക്ക് പുറത്തു വച്ചാണ് സംഭവം നടന്നത്. സെക്യൂരിറ്റി ഗാര്‍ഡ് സംഭവത്തെക്കുറിച്ച് കുടുംബാംഗങ്ങളെ വിവരമറിയിക്കുകയും തുടര്‍ന്ന് അദ്ദേഹത്തെ ഷെല്‍ബി ഹോസ്പിറ്റലില്‍ എത്തിക്കുകയും ചെയ്തു.
ഷെല്‍ബി ഹോസ്പിറ്റലില്‍ ഒരു ദിവസത്തെ നിരീക്ഷണത്തിന് ശേഷം, ദേശായിയെ ശസ്ത്രക്രിയയ്‌ക്കായി സൈഡസ് ആശുപത്രിയിലേക്ക് മാറ്റി. എന്നാല്‍, ചികിത്സയ്‌ക്കിടെ മസ്തിഷ്‌ക രക്തസ്രാവത്തെ തുടര്‍ന്ന് അദേഹം മരണത്തിന് കീഴടങ്ങുകയായിരുന്നു. വാഗ് ബക്രി ടീ ഗ്രൂപ്പിന്റെ മാനേജിംഗ് ഡയറക്ടര്‍ രസേഷ് ദേശായിയുടെ മകനാണ് പരാഗ് ദേശായി. ഭാര്യ വിദിഷയും മകള്‍ പരിഷയുമാണ്. 30 വര്‍ഷത്തിലധികം വ്യാവസായിക പരിചയമുള്ള ദേശായി, ഗ്രൂപ്പിന്റെ ഇന്റര്‍നാഷണല്‍ ബിസിനസ്, സെയില്‍സ്, മാര്‍ക്കറ്റിംഗ് എന്നിവയ്‌ക്ക് നേതൃത്വം നല്‍കി.
പ്രതികരിക്കാൻ ഇവിടെ എഴുതുക: