മാണ്ഡ്യ: കര്ണാടകയിലെ മാണ്ഡ്യയിലാണ് 90 കളിലിറങ്ങിയ ഹിന്ദി സിനിമയിലേത് പോലെ അത്യപൂര്വ്വ സംഭവം അരങ്ങേറിയത്. ഗ്രാമവാസിയായ സ്ത്രീയുടെ ഭര്ത്താവിന് മറ്റൊരു സ്ത്രിയുമായി ബന്ധമുണ്ടെന്ന് കണ്ടെത്തിയതിനെ തുടര്ന്നുണ്ടായ സംഭവമാണ് ഭര്ത്താവിനെ കച്ചവടം നടത്തുന്നതിലേക്ക് എത്തിച്ചത്.
സംഭവമിങ്ങനെ, ഭര്ത്താവിന്റെ പരസ്ത്രീ ബന്ധത്തെ കയ്യോടെ പിടികൂടിയ ഭാര്യ ഈ വിഷയത്തെച്ചൊല്ലി കാമുകിയുമായി വാക്കേറ്റമുണ്ടാവുകയും അത് അവസാനം പ്രശ്നപരിഹാരത്തിനായി പഞ്ചായത്തിലെത്തി. ഭര്ത്താവിന്റെ പരസ്ത്രീ ബന്ധം പഞ്ചായത്ത് പ്രതിനിധികളോട് വിവരിച്ചു.
എന്നാല് കാമുകിയുടെ വെളിപ്പെടുത്തലോടെ കാര്യം ക്ലൈമാക്സിലേക്ക് നീങ്ങി. നിങ്ങളുടെ ഭര്ത്താവ് തനിക്ക് അഞ്ച് ലക്ഷം രൂപ തരാനുണ്ടെന്നും അത് തിരികെ തന്നാല് ബന്ധം ഉപേക്ഷിക്കാമെന്നും പറഞ്ഞു. എന്നാല് തനിക്ക് അഞ്ച് ലക്ഷം രൂപ തന്നിട്ട് ഭര്ത്താവിനെ നിങ്ങള് എടുത്തോളു…. പരസ്ത്രീ ബന്ധമുള്ള ഭര്ത്താവിനെ വേണ്ട എന്നതായിരുന്നു ഭാര്യയുടെ നിലപാട്.
ഇതോടെ അഞ്ചുലക്ഷം രൂപ തരാന് സന്നദ്ധമാണെന്ന് കാമുകി അറിയിക്കുകയും പണം നല്കാന് ഒരുമാസം സാവകാശം വേണമെന്നും അറിയിച്ചു. ഇതോടെ ഭര്ത്താവിനെ വില്ക്കാന് തയ്യാറായ ഭാര്യ പണം നല്കാനുള്ള സാവകാശം അനുവദിച്ച് കച്ചവടം ഉറപ്പിച്ചു. പഞ്ചായത്ത് പ്രതിനിധികള്ക്കും നാട്ടുകാര്ക്കും സാക്ഷികളായി അമ്പരന്ന് നില്കാനെ കഴിയുമായിരുന്നുള്ളു.
90കളില് പുറത്തിറങ്ങിയ അനില്കപൂര്, ശ്രീദേവി, ഊര്മ്മിള മഡോദ്കര് അഭിനയിച്ച ജുദായി എന്ന സിനിമയെ ഓര്മ്മിപ്പിക്കുന്ന രംഗങ്ങളായിരുന്നു നടന്നത്. അനില്കപൂറിന്റെ ഭാര്യയായ ശ്രീദേവി രണ്ട് കോടി രൂപയ്ക്ക് ഭര്ത്താവിനെ വില്ക്കുന്നതാണ് സിനിമയുടെ കഥാതന്തു.
