സപ്തഭാഷാ സംഗമഭൂമിയായ കാസര്ക്കോടന് മണ്ണില് നിന്നും മണ്ണിന്റെ മക്കളുടെ കഥപറയുന്നൊരു ചിത്രം. ആദിവാസി ഗോത്രവിഭാഗമായ മാവിലാന് ഭാഷയയായ മര്ക്കോടിയില് ഒരുക്കിയിരിക്കുന്ന ‘ ഒങ്കാറ ‘ ഈ ഭാഷയില് ഒരുക്കിയിരിക്കുന്ന ആദ്യചിത്രമെന്ന ഖ്യാതി നേടുന്നു. നവാഗതനായ ഉണ്ണി കെ ആര് ആണ് ചിത്രത്തിന്റെ സംവിധായകന്. കാട് വീടാക്കിയ ഗോത്രവിഭാഗമാണ് മാവിലാന് സമുദായം. പുനം കൃഷിനടത്തിയും കാട്ടുമൃഗങ്ങളെ വേട്ടയാടിയും ഉപജീവനം കഴിച്ചിരുന്ന ഗോത്രവിഭാഗത്തിന്റെ അതിജീവനത്തിന്റെ കഥകൂടിയാണ് ‘ ഒങ്കാറ ‘ . സുധീര് കരമനയാണ് ഒങ്കാറയില് മുഖ്യവേഷത്തിലെത്തുന്നത്. ഒരു തെയ്യം കലാകാരന്റെ വേഷത്തിലാണ് സുധീര് കരമനയെത്തുന്നത്. ആദിവാസി വിഭാഗമായ മാവിലാന് സമൂഹത്തിന്റെ ഇടയില് സംസാരഭാഷയായി ഉപയോഗിക്കുന്ന മര്ക്കോടിക്ക് ലിപികളില്ല. പ്രാദേശികമായി മാവിലവു എന്നപേരില് അറിയപ്പെടുന്ന മര്ക്കോടി ഭാഷ വാമൊഴിയായാണ് തലമുറകളിലേക്ക് കൈമാറുന്നത്. ഒങ്കാറയുടെ തിരക്കഥയൊരുക്കിയിരിക്കുന്നത് പത്രപ്രവര്ത്തകനും എഴുത്തുകാരനുമായ രാജേഷ് തില്ലങ്കേരിയാണ്.
നൂറ്റാണ്ടുകളായി അടിമകളായി കഴിഞ്ഞിരുന്ന ഗോത്രവിഭാഗത്തിന്റെ അതിജീവനത്തിന്റെയും പോരാട്ടത്തിന്റെയും കഥപറയുന്ന ആറോളം പരമ്പരാഗത ഗാനങ്ങളുടെ അകമ്പടിയോടെയാണ് സിനിമ ഒരുക്കിയിരിക്കുന്നതെന്ന് സംവിധായകന് പറയുന്നു. ഗോത്രവിഭാഗങ്ങളുടെ സംസ്കാരവും ആചാരങ്ങളും അനുഷ്ഠാനങ്ങളും കൈമോശം വന്നു കൊണ്ടിരിക്കയാണ്. ഭാഷയും സംസ്കാരവും കലയും ചരിത്രതാളുകളിലേക്ക് ആവാഹിക്കുകയെന്ന ദൗത്യമാണ് ഞങ്ങള് ഒങ്കാറയിലൂടെ നമ്മള് നിര്വ്വഹിച്ചിരിക്കുന്നതെന്ന് സംവിധായകന് പറയുന്നു.
‘ഗോത്രവിഭാഗത്തിന്റെ പഴയകാല ജീവിതത്തെ അടിസ്ഥാനമാക്കിയുള്ളതാണ് ഒങ്കാറയുടെ കഥ. പൂര്ണ്ണമായും ഉള്ക്കാട്ടില് ചിത്രീകരിച്ചിരിക്കുന്നു എന്നതും ചിത്രത്തിലെ എല്ലാ കഥാ പാത്രങ്ങളും ആദിദ്രാവിഡ ഗോത്രഭാഷയായ മര്ക്കോടി മാത്രം സംസാരിക്കുന്നുവെന്നതും ഈ ചിത്രത്തിന്റെ പ്രത്യേകതയാണ്. പുറം ലോകം ഏറെ കണ്ടിട്ടില്ലാത്ത വിവിധ ഗോത്ര തെയ്യങ്ങളും മംഗലംകളിയും പ്രാചീനകാലത്ത് പ്രചാരത്തിലുണ്ടായിരുന്ന ഗാനങ്ങളും ഒങ്കാറയില് ഉള്പ്പെടുത്തിയിട്ടുണ്ട്.
ഈ ചിത്രത്തില് സുധീര് കരമനയ്ക്കൊപ്പം വെട്ടുകിളി പ്രകാശ്, സുഭാഷ് രാമനാട്ടുകര, ഗോപിക വിക്രമന്, സാധിക വേണുഗോപാല്, അരുന്ധതി നായര്, രമ്യ ജോസഫ്, ആഷിക് ദിനേശ്, ജിബു ജോര്ജ്ജ്, റാം വിജയ്, സച്ചിന്, സജിലാൽ തുടങ്ങിയ താരങ്ങളും പ്രധാന കഥാപാത്രങ്ങളായി എത്തുന്നു. വിതുര, കല്ലാര്, കാസര്ക്കോട് എന്നിവിടങ്ങളിലായിരുന്നു ചിത്രീകരണം.
ക്രിസ്റ്റല് മീഡിയ, വ്യാസ ചിത്ര, സൗ സിനി മാസ്, എന്നിവയുടെ ബാനറില് സുഭാഷ് മേനോന്, ജോര്ജ്ജ് തോമസ് വെള്ളാറേത്ത്, ഡോ. പ്രഹ്ലാദ് വടക്കേപ്പാട്, സൗമ്യ എന്നിവര് ചേര്ന്നാണ് നിര്മ്മാണം. ഛായാഗ്രഹണം : വിനോദ് വിക്രം, പ്രശാന്ത് കൃഷ്ണ, എഡിറ്റര് : സിയാന് ശ്രീകാന്ത്, പ്രൊജക്റ്റ് കോ- ഓഡിനേറ്റര്. : ഒ കെ പ്രഭാകരന്. നിര്മ്മാണ നിര്വ്വഹണം : കല്ലാര് അനില്, മേക്കപ്പ് : ജയന് പൂങ്കുളം, വസ്ത്രാലങ്കാരം ശ്രീജിത്ത്, ഷിനു ഉഷസ്, കല അഖിലേഷ് പ്രൊഡക്ഷൻ ശബ്ദസംവിധാനം : രാധാകൃഷ്ണന്, സംഗീതം : സുധേന്ദു രാജ്, പി ആര് ഒ : എ എസ്. ദിനേശ്
