ന്യൂദല്ഹി: സെമികണ്ടക്ടര്, ആര്ട്ടിഫിഷ്യല് ഇന്റലിജിന്സ്, ക്വാണ്ടം കമ്പ്യൂട്ടിങ് മേഖലകളില് കേന്ദ്ര ഇലക്ട്രോണിക്സ്, ഐടി മന്ത്രാലയവും ഐബിഎം ഇന്ത്യയും തമ്മില് സഹകരിച്ച് പ്രവര്ത്തിക്കും. സിഡാക്കും എഐ ഇന്ത്യ-ഡിജിറ്റല് കോര്പറേഷനും ഇന്ത്യ സെമികണ്ടക്ടര് മിഷനും ഐബിഎം ഇന്ത്യയുമായി ധാരണാപത്രത്തില് ഒപ്പുവച്ചു.
ഇലക്ട്രോണിക്സ് വ്യവസായ മേഖലയിലെ മുന്നേറ്റത്തിന് വേഗത കൂട്ടാന് ധാരണാപത്രം വഴി തെളിക്കുമെന്ന് ചടങ്ങില് പങ്കെടുത്ത കേന്ദ്രമന്ത്രി രാജീവ് ചന്ദ്രശേഖര് അഭിപ്രായപ്പെട്ടു. ഇലക്ട്രോണിക്സ് വികസനത്തില് പ്രധാനമന്ത്രി നരേന്ദ്രമോദി വിഭാവനം ചെയ്യുന്ന മൂന്ന് മേഖലയിലും ഏറെ മുന്നേറാന് ഇത് കരുത്ത് പകരും.
ക്വാണ്ടം കമ്പ്യൂട്ടിങ്മേഖലയില് ആവശ്യമായ ഉദ്യോഗാര്ത്ഥികളെ പ്രാപ്തമാക്കുന്നതിനും വ്യവസായവികസനത്തിനും ഗവേഷണത്തിനും ധാരണാപത്രം സഹായകമാവും. നിര്മ്മിത ബുദ്ധി മുതലായ മേഖലകളില് പരസ്പര സഹകരണത്തിനുള്ള ചട്ടക്കൂട് സ്ഥാപിക്കുന്നതിന് വഴി തെളിക്കും. എഐ ഇന്നൊവേഷന് പ്ലാറ്റ്ഫോം (എഐഐപി) സ്ഥാപിക്കാന് ഇന്ത്യ എഐയും ഐബിഎമ്മും സഹകരിക്കും.
സെമികണ്ടക്ടര് ഗവേഷണകേന്ദ്രം സ്ഥാപിക്കുന്നതിനും അര്ദ്ധചാലകങ്ങളില് ലോകോത്തര ഗവേഷണം നടത്തുന്നതിന് സഹായകമായ കഴിവുകള് പകര്ന്നു നല്കുന്നതിനും ധാരണാപത്രം സഹായകമാവും. സര്വകലാശാലകള്, സ്റ്റാര്ട്ടപ്പുകള് എന്നിവയുമായി സഹകരിച്ച് തദ്ദേശീയ അര്ദ്ധചാലക ഫാബുകളുടെ നിര്മാണവും പ്രോട്ടോടൈപ്പ് ചെയ്ത് ഉത്പാദിപ്പിക്കാന് സാധ്യതയുള്ള ചിപ്പ് ഡിസൈന് ചെയ്യുന്നതും ധാരണയില്പ്പെടുന്നു.
ഇന്ത്യന് സ്റ്റാര്ട്ടപ്പുകള്ക്ക് വേണ്ട മാര്ഗനിര്ദേശങ്ങള് കരാര് യാഥാര്ത്ഥ്യമാക്കും. ഇലക്ട്രോണിക്സ് വകുപ്പ് സെക്രട്ടറി എസ്. കൃഷ്ണന്, ഐബിഎം ഇന്ത്യ മാനേജിങ് ഡയറക്ടര് സന്ദിപ് പട്ടേല്, മുതിര്ന്ന ഉദ്യോഗസ്ഥര് എന്നിവരും ഇലക്ട്രോണിക്സ് മന്ത്രാലയത്തില് നടന്ന വാര്ത്താസമ്മേളനത്തില് പങ്കെടുത്തു.
