തിരുവനന്തപുരം: പെണ്‍കുട്ടിയെ വീട്ടില്‍ക്കയറി കുത്തിക്കൊല്ലാന്‍ ശ്രമം. നേമം കാരയ്‌ക്കാമണ്ഡപം സ്വദേശിനി രമ്യ രാജീവിനെയാണ് വള്ളക്കടവ് സ്വദേശി ദീപക് ആക്രമിച്ചത്. ഗുരുതരമായി പരിക്കേറ്റ പെണ്‍കുട്ടിയെ തിരുവനന്തപുരം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. സംഭവത്തിന് പിന്നാലെ ദീപക്കും കഴുത്തുമുറിച്ച് ജീവനൊടുക്കാന്‍ ശ്രമിച്ചിരുന്നു. ഇയാളും ആശുപത്രിയില്‍ ചികിത്സയിലാണ്.
ഇന്ന് രാവിലെ കാരയ്‌ക്കാമണ്ഡപത്തെ രമ്യയുടെ വീട്ടില്‍വെച്ചാണ് സംഭവമുണ്ടായത്. ഇരുവരും നാലുവര്‍ഷമായി പ്രണയത്തിലായിരുന്നുവെന്ന് പോലീസ് പറയുന്നു. രമ്യയെ വീട്ടില്‍നിന്ന് വിളിച്ചിറക്കി കൊണ്ടുപോകാനാണ് ദീപക് രാവിലെ വീട്ടിലെത്തിയത്. തന്നോടൊപ്പം ഇറങ്ങിവരണമെന്ന് ഇയാള്‍ ആവശ്യപ്പെട്ടെങ്കിലും പെണ്‍കുട്ടി കൂട്ടാക്കിയില്ല.
തുടര്‍ന്ന് ഇരുവരും തമ്മില്‍ വാക്കുതര്‍ക്കമുണ്ടായെന്നും പിന്നാലെ വീട്ടിലുണ്ടായിരുന്ന കത്തികൊണ്ട് യുവാവ് പെണ്‍കുട്ടിയെ കുത്തിപരിക്കേല്‍പ്പിച്ചെന്നുമാണ് പ്രാഥമിക വിവരം. പെണ്‍കുട്ടിയുടെ കഴുത്തിനാണ് കുത്തേറ്റത്. മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ച പെണ്‍കുട്ടിയുടെ നില ഗുരുതരമാണെന്നാണ് വിവരം.
പ്രതികരിക്കാൻ ഇവിടെ എഴുതുക: