എക്സിൽ പുതിയ സബ്‌സ്‌ക്രിപ്ഷൻ സംവിധാനം പരീക്ഷിക്കാനൊരുങ്ങി ഇലോൺ മസ്ക്. നോട്ട് എ ബോട്ട് എന്ന പുതിയ സബ്‌സ്‌ക്രിപ്ഷൻ എടുത്താൽ മാത്രമേ എക്‌സിലെ പ്രധാന സേവനങ്ങൾ ലഭ്യമാകൂ. ലൈക്ക് ചെയ്യുക, റീ പോസ്റ്റുകൾ, മറ്റ് അക്കൗണ്ടുകൾ കോട്ട് ചെയ്യുക, വെബ് വേർഷനിൽ പോസ്റ്റുകൾ ബുക്ക്മാർക്ക് ചെയ്യുക എന്നിങ്ങനെ അടിസ്ഥാന സൗകര്യങ്ങൾ ഉപയോഗിണമെങ്കിൽ ഇനി സബ്‌സ്‌ക്രൈബ് ചെയ്യണം.വാർഷിക നിരക്കായി ഒരു ഡോളറാണ് ഇതിന് വേണ്ടി നൽകേണ്ടി വരിക.
ബോട്ട് അക്കൗണ്ടുകൾ, സ്പാം അക്കൗണ്ടുകൾ എന്നിവയെ ചെറുക്കുന്നതിന്റെ ഭാഗമായാണ് പുതിയ സബ്‌സ്‌ക്രിപ്ഷൻ അവതരിപ്പിക്കുന്നത്. ഓരോ രാജ്യത്തും എക്‌സേഞ്ച് നിരക്ക് അനുസരിച്ച് നിരക്കിലും വ്യത്യാസമുണ്ടാകും. ന്യൂസിലാൻഡ്, ഫിലിപ്പീൻസ് എന്നീ രാജ്യങ്ങളിലാകും ഈ സേവനം ആദ്യമെത്തുക. പരീക്ഷണ ഘട്ടമായതിനാൽ നിലവിലുള്ള ഉപയോക്താക്കളെ ഇത് ബാധിക്കില്ല. എന്നാൽ പുതിയതായി അക്കൗണ്ട് ആരംഭിക്കുന്ന ഉപയോക്താക്കൾ സബ്‌സ്‌ക്രിപ്ഷൻ എടുക്കേണ്ടതുണ്ട്. അല്ലാത്ത പക്ഷം ട്വീറ്റുകൾ കാണാനും വീഡിയോകൾ കാണാനും സാധിക്കില്ല.
ട്വിറ്ററിലെ പ്രധാന പ്രശ്‌നങ്ങളിൽ ഒന്നാണ് ബോട്ടുകൾ. വ്യാജ വാർത്തകൾ പ്രചരിപ്പിക്കുന്നതിനും തട്ടിപ്പുകൾക്കും ഉൾപ്പെടെ ബോട്ട്-സ്പാം അക്കൗണ്ടുകൾ വ്യാപകമായി ഉപയോഗിക്കുന്നുണ്ട്. ഇതിന് തടയിടുന്നതിന് വേണ്ടിയാണ് ഇത്തരത്തിലൊരു നീക്കമെന്നാണ് കമ്പനി അവകാശപ്പെടുന്നത്.
പ്രതികരിക്കാൻ ഇവിടെ എഴുതുക: