കുന്നംകുളം: സംസ്ഥാന സ്കൂള് കായികോത്സവത്തിന് ഇന്ന് തൃശ്ശൂര് കുന്നംകുളം ഗവ. മോഡല് ബോയ്സ് ഹയര്സെക്കന്ഡറി സ്കൂളില് തുടക്കം. 14 ജില്ലകളില് നിന്നായി മൂവായിരത്തിലേറെ കായികപ്രതിഭകള് മാറ്റുരയ്ക്കും. 20നു സമാപിക്കും. ഇന്ന് 21 ഫൈനലുകള്. രാവിലെ ഏഴിന് ജൂനിയര് പെണ്കുട്ടികളുടെയും ആണ്കുട്ടികളുടെയും 3000 മീറ്റര് മത്സരത്തോടെ ട്രാക്കുണരും.
വടക്കുന്നാഥ ക്ഷേത്രത്തിന്റെ തെക്കേ ഗോപുരനടയില് മന്ത്രി ഡോ.ആര്. ബിന്ദു മുന് ദേശീയ ഫുട്ബോള് ക്യാപ്റ്റന് ഐ.എം. വിജയന് കൈമാറി ദീപശിഖാ പ്രയാണം ഉദ്ഘാടനം ചെയ്തു. വൈകിട്ട് പ്രധാന വേദിയിലെത്തിയ ദീപശിഖയെ എ.സി. മൊയ്തീന് എംഎല്എയുടെ നേതൃത്വത്തില് സ്വീകരിച്ചു.
ഇന്നു രാവിലെ 9ന് പൊതു വിദ്യാഭാസ ഡയറക്ടര് പതാക ഉയര്ത്തും. വൈകിട്ട് 3.30 ന് മന്ത്രി വി. ശിവന്കുട്ടി ഉദ്ഘാടനം ചെയ്യും. കുട്ടികളുടെ മാര്ച്ച് പാസ്റ്റിനു ശേഷം ഒളിമ്പ്യന് ലിജോ ഡേവിഡ് തൊട്ടാനവും ദീപശിഖ ഏറ്റുവാങ്ങും. പൊതു വിദ്യാഭ്യാസ ജോയിന്റ് ഡയറക്ടര് കൂടിയായ പദ്മശ്രീ ഒളിമ്പ്യന് പി.ആര്. ശ്രീജേഷ് ഗ്രൗണ്ടില് ദീപശിഖ തെളിക്കും.
ജന്മഭൂമി ഓണ്ലൈന്