തിരുവനന്തപുരം : ശക്തമായ മഴയുടെ പശ്ചാത്തലത്തില് വെളളം പൊങ്ങിയതിനെ തുടര്ന്ന് തിരുവനന്തപുരം ജില്ലയില് 21 ദുരിതാശ്വാസ ക്യാമ്പുകള് തുറന്നു. ക്യാമ്പുകളില് ആകെ 875 പേരാണുളളത്. ദുരിതാശ്വാസ ക്യാമ്പുകള് പ്രവര്ത്തിക്കുന്ന സ്കൂളുകള്ക്ക് തിങ്കളാഴ്ച അവധി നല്കി.
തിരുവനന്തപുരം താലൂക്കിലാണ് (16 )ഏറ്റവും കൂടുതല് ക്യാമ്പുകള്. ഇവിടെ 580 പേരാണുള്ളത്. ജില്ലയില് ആറ് വീടുകള് പൂര്ണമായും 11 വീടുകള് ഭാഗികമായും തകര്ന്നെന്നാണ് ഔദ്യോഗിക കണക്ക്. ചിറയിന്കീഴ് താലൂക്കില് നാല് ക്യാമ്പുകളിലായി 249 പേരെയും വര്ക്കല താലൂക്കിലെ ഒരു ക്യാമ്പില് 46 പേരെയും മാറ്റിപാര്പ്പിച്ചു.
തിരുവനന്തപുരം താലൂക്ക്
കടകംപള്ളി വില്ലേജില് മൂന്ന് ക്യാമ്പുകളാണുള്ളത്. വെട്ടുകാട് സെന്റ് മേരീസ് എല്.പി.എസ്, കരിക്കകം ഗവ.എച്ച്.എസ്, വേളി യൂത്ത് ഹോസ്റ്റല് എന്നിവിടങ്ങളിലായി 36 പേരാണ് ഉളളത്.
പട്ടം വില്ലേജില് കേദാരം ലൈന് എന്.എസ്.എസ് ഓഡിറ്റോറിയത്തിലെ ക്യാമ്പില് 56 പേരെ മാറ്റി പാര്പ്പിച്ചിട്ടുണ്ട്. തേക്കുംമൂട് താത്കാലിക ക്യാമ്പില് 260 പേരുണ്ട്. കുന്നുകുഴി ഗവണ്മെന്റ് എല്പിഎസില് 26 പേരാണുളളത്. മേക്കേപ്പട്ടം ഗവണ്മെന്റ് എല്.പി.എസിലും ക്യാമ്പ് തുറന്നെങ്കിലും ആരും അഭയം തേടിയില്ല.
ആറ്റിപ്ര വില്ലേജില് കാട്ടില് എല്.പി.എസില് 10 പേരാണുളളത്. പൗണ്ട്കടവ് മോസ്കില് 38 പേരുണ്ട്. കല്ലിയൂര് വില്ലേജില് പൂങ്കുളം സ്കൂളില് 18 കുടുംബങ്ങളില് നിന്നായി 40 പേരും വെള്ളായണി എം.എന്.എല്.പി.എസില് 40 പേരുമുണ്ട്. തിരുവല്ലം വില്ലേജില് പാച്ചല്ലൂര് ഗവണ്മെന്റ് എല്.പി.എസില് 6 പേരാണുളളത്.
പള്ളിപ്പുറം വില്ലേജില് ആലുംമൂട് എല്.പി.എസില് 14 കുടുംബങ്ങളില് നിന്നായി 46 പേരാണുളളത്. കരിച്ചാല് സ്കൂളില് ക്യാമ്പ് തുറന്നെങ്കിലും ആരും എത്തിയിട്ടില്ല. വെയിലൂര് വില്ലേജില് പഞ്ചായത്ത് ഇന്ഡോര് സ്റ്റേഡിയത്തില് 22 പേരെ മാറ്റി പാര്പ്പിച്ചു. പേട്ട വില്ലേജില് ഈഞ്ചക്കല് ഗവണ്മെന്റ് യു.പി.എസില് ക്യാമ്പ് തുറന്നെങ്കിലും ആളുകള് ഇല്ല
ചിറയിന്കീഴ് താലൂക്ക്
ആറ്റിങ്ങല് വില്ലേജില് മുല്ലേശ്ശേരി എല്.പി.എസില് നാല് കുടുംബങ്ങളിലെ 15 പേരാണ് ഉള്ളത്. കിഴുവില്ലം വില്ലേജില് പുറവൂര് എസ്.വി യു.പി.എസില് ആറ് കുടുംബങ്ങളിലെ 28 പേരുണ്ട്. പടനിലം എല്.പി.എസില് രണ്ട് കുടുംബങ്ങളിലെ ആറ് പേരുണ്ട്. ചിറയിന്കീഴ് വില്ലേജില് ശാര്ക്കര യു.പി.എസില് 41 കുടുംബങ്ങളുണ്ട്.
വര്ക്കല താലൂക്ക്
ഇടവ വില്ലേജില് വെണ്കുളം ഗവണ്മെന്റ് എല്.പി.എസില് ഒന്പത് കുടുംബങ്ങളിലെ 46 പേരാണുളളത്.
