തിരുവനന്തപുരം: വിവരാവകാശ നിയമപ്രകാരമുള്ള അപേക്ഷകളില് വിവരം നിഷേധിക്കുക, വൈകിപ്പിക്കുക, തെറ്റിദ്ധരിപ്പിക്കുക, അധികഫീസ് വാങ്ങുക തുടങ്ങിയ കുറ്റങ്ങള്ക്ക് വിവിധ വകുപ്പുകളിലെ അഞ്ച് ഉദ്യോഗസ്ഥരെ 40,000 രൂപ ശിക്ഷിച്ച് സംസ്ഥാന വിവരാവകാശ കമ്മിഷന്. ഒരു പോലീസ് ഓഫീസറെ കുറ്റവിമുക്തനാക്കിയും രണ്ട് അപേക്ഷകര്ക്ക് പണം തിരികെ നല്കാന് നിര്ദേശിച്ചും വിവരാവകാശ കമ്മിഷണര് എ. അബ്ദുല് ഹക്കിം ഉത്തരവായി.
കൊല്ലം പരവൂര് കൂനയില് ജെ. രതീഷ്കുമാറിന്റെ പരാതിയില് പരവൂര് വില്ലേജ് ഓഫീസര് ടി.എസ്. ബിജുലാല് 5000 രൂപ, പാലക്കാട് അകത്തേത്തറ എല്. പ്രേംകുമാറിന്റെ അപ്പീലില് പാലക്കാട് ക്ഷീരവികസന ഡെപ്യൂട്ടി ഡയറക്ടര് ഓഫീസിലെ എന്. ബിന്ദു 1000 രൂപ, കണ്ണൂര് കണ്ടകാളിയില് കെ.പി. ജനാര്ദനന്റെ ഹര്ജിയില് പയ്യന്നൂര് ഇലക്ട്രിക്കല് സെക്ഷനിലെ എന്. രാജീവ് 25000 രൂപ, തിരുവനന്തപുരം വര്ക്കല ഇലകമണ് എസ്. സാനു കക്ഷിയായ കേസില് ആറ്റിങ്ങല് കെഎസ്ആര്ടിസിയിലെ ആര്.വി. സിന്ധു 5000 രൂപ, തിരുവനന്തപുരം ചെറിയകൊണ്ണി കെ. രവീന്ദ്രന് നായര് നെടുമങ്ങാട് ബ്ലോക്ക് പഞ്ചായത്തില് സമര്പ്പിച്ച അപേക്ഷയില് പൊതുബോധന ഓഫീസര് ഉമാശങ്കര് 4000 രൂപ എന്നിങ്ങനെയാണ് പിഴ ഒടുക്കേണ്ടത്.
കൊല്ലം ചാത്തന്നൂര് സബ് രജിസ്ട്രാര്, പാണിയില് കെ.സതീശനില് നിന്ന് തെരച്ചില് ഫീസ്, മാര്യേജ് ആക്ട് ഫീസ് എന്നീ ഇനങ്ങളില് വാങ്ങിയ 380 രൂപ തിരികെ നല്കാനും കമ്മിഷന് നിര്ദേശിച്ചു. കാസര്കോട് കൂഡ്ലുവില് എല്. ജയശ്രീയോട് തഹസീല്ദാര് ഫീസായി ആവശ്യപ്പെട്ട 506 രൂപ നല്കേണ്ടതില്ലെന്നും പകരം ഒമ്പത് രൂപയ്ക്ക് മുഴുവന് വിവരങ്ങളും സാക്ഷ്യപ്പെടുത്തിയ രേഖാപകര്പ്പുകളും ലഭ്യമാക്കണമെന്നും ഉത്തരവായി.
