യൂട്യൂബിൽ ട്രെൻഡിംഗ് ലിസ്റ്റിൽ ഇടംനേടി പ്രധാനമന്ത്രി രചിച്ച ഗാർബ ഗാനം. തനിഷ്‌ക് ബാഗ്ചിയുടെ സംഗീതത്തിൽ ധ്വനി ഭാനുശാലിയാണ് ഗാനം ആലപിച്ചിരിക്കുന്നത്. ഗാനം റിലീസ് ചെയ്തതിന് പിന്നാലെ നിരവധി പേരാണ് ആശംസകളുമായി എത്തിയിരിക്കുന്നത്. നവരാത്രി ആഘോഷങ്ങളിൽ അവതരിപ്പിക്കപ്പെടുന്ന പ്രധാന നൃത്തരൂപമായ ഗാർബയെയാണ് ഗാനമാക്കി മാറ്റിയിരിക്കുന്നത്.
പ്രചോദനാത്മകം എന്നാണ് കങ്കണ റണാവത്ത് പറഞ്ഞത്. അടൽ ജിയുടെ കവിതകളായാലും നരേന്ദ്രമോദിജിയുടെ പാട്ടുകളായാലും കവിതകളായാലും കഥ പറച്ചിലായാലും എത്ര മനോഹരമാണ്. ധീര നായകന്മാർ കലയുടെ സൗന്ദര്യത്തിലും ആർദ്രതയിലും മുഴുകുന്നത് കാണുന്നത് തന്നെ ഹൃദയസ്പർശിയായ കാര്യമാണ്. എല്ലാ കലാകാരന്മാർക്കും വളരെ പ്രചോദനം നൽകുന്നു- താരം എക്സിൽ കുറിച്ചു.
താങ്കളുടെ ഗാർബ വരികൾ ഏറെ ഇഷ്ടപ്പെട്ടു. പുതിയ താളവും രചനയും ഇമ്പവുമുള്ള ഗാനമായിരുന്നു ഞങ്ങൾക്ക് ആവശ്യം. ഈ പാട്ടിനെയും വീഡിയോയും ജീവസുറ്റതാക്കാൻ അങ്ങേയ്‌ക്ക് കഴിഞ്ഞു- ഗായിക ധ്വനി എക്സിൽ കുറിച്ചു. വീഡിയോ പങ്കുവെച്ച് കൊണ്ടായിരുന്നു അവരുടെ വാക്കുകൾ. വർഷങ്ങൾക്ക് മുൻപ് എഴുതിയ ഗർബയുടെ ഈ മനോഹരമായ അവതരണത്തിന് ധ്വനി ഭാനുശാലിക്കും തനിഷ്‌ക് ബാഗ്ചിക്കും സംഘത്തിനും നന്ദി- പ്രധാനമന്ത്രി എക്സിൽ കുറിച്ചു. അടുത്ത ദിവസങ്ങളിൽ പുതിയൊരു ഗർബ ഗാനം കൂടി രചിച്ചിട്ടുണ്ടെന്നും നവരാത്രി ദിനത്തിൽ പങ്കുവെയ്‌ക്കുമെന്നും പ്രധാനമന്ത്രി പറഞ്ഞു.
പ്രതികരിക്കാൻ ഇവിടെ എഴുതുക: