ബെംഗളൂരു: യുവതിയുടെ ചിത്രങ്ങള് മോര്ഫ് ചെയ്ത് പ്രചരിപ്പിച്ച കേസില് ലിവ് ഇന് പങ്കാളി അറസ്റ്റില്. തമിഴ്നാട് വെല്ലൂര് സ്വദേശിയായ സഞ്ജയ് കുമാറിനെയാണ് (26) ലിവ് ഇന് പങ്കാളിയായ യുവതിയുടെ പരാതിയില് ബെംഗളൂരു പോലീസ് അറസ്റ്റ് ചെയ്തത്. മോര്ഫ് ചെയ്ത അശ്ലീലചിത്രങ്ങള്ക്ക് താഴെവരുന്ന കമന്റുകള് വായിച്ച് ആനന്ദം കണ്ടെത്തുന്നതിനായാണ് ഇയാള് ഇത് ചെയ്തതെന്ന് പോലീസ് പറഞ്ഞു. ഒട്ടേറെ സുഹൃത്തുക്കളുടെയും ബന്ധുക്കളുടെയും മോര്ഫ് ചെയ്ത ചിത്രങ്ങളും ഇയാള് സാമൂഹികമാധ്യമങ്ങളില് പ്രചരിപ്പിച്ചിട്ടുണ്ടെന്നും പോലീസ് പറഞ്ഞു.
പരാതിക്കാരിയായ 24-കാരിയും സഞ്ജയ് കുമാറും വെല്ലൂര് സ്വദേശികളാണ്. പത്താംക്ലാസ് മുതല് പരസ്പരം പരിചയമുള്ള ഇരുവരും കുറച്ചുകാലമായി ബെംഗളൂരുവില് ഒരുമിച്ചായിരുന്നു താമസം. ഉടന് വിവാഹിതരാകാനും ഇവര് തീരുമാനിച്ചിരുന്നു. ഇതിനിടെയാണ് യുവതിയുടെ മോര്ഫ് ചെയ്ത ചിത്രങ്ങള് സാമൂഹികമാധ്യമങ്ങളില് വ്യാപകമായി പ്രചരിച്ചത്. ഇന്സ്റ്റഗ്രാം, ടെലിഗ്രാം അടക്കമുള്ള സാമൂഹികമാധ്യമങ്ങളിലാണ്
അശ്ലീലചിത്രങ്ങള് പ്രചരിച്ചിരുന്നത്. ഇത് ശ്രദ്ധയില്പ്പെട്ടതോടെ യുവതി പോലീസ് സ്റ്റേഷനിലെത്തി നേരിട്ട് പരാതി നല്കി. പരാതി നല്കാനായി സഞ്ജയ് കുമാറും യുവതിക്കൊപ്പം സ്റ്റേഷനിലെത്തിയിരുന്നു.
സംഭവത്തില് കേസെടുത്ത പോലീസ്, സാമൂഹികമാധ്യമങ്ങളില്നിന്ന് ചിത്രങ്ങള് നീക്കംചെയ്യാനാണ് ആദ്യം ശ്രമിച്ചത്. ഇതിനായി സാമൂഹികമാധ്യമ പ്ലാറ്റ്ഫോമുകളെ സമീപിച്ചു. ചിത്രങ്ങള് ഓണ്ലൈനില് പ്രചരിപ്പിച്ച അക്കൗണ്ടുകളെക്കുറിച്ചുള്ള വിവരങ്ങളും സാമൂഹികമാധ്യമ പ്ലാറ്റ്ഫോമുകളില്നിന്ന് ശേഖരിച്ചു. ഈ വിവരങ്ങള് കേന്ദ്രീകരിച്ച് നടത്തിയ അന്വേഷണത്തിലാണ് പ്രതി പരാതിക്കാരിയുടെ ആണ്സുഹൃത്ത് തന്നെയാണെന്ന് വ്യക്തമായത്. തുടര്ന്ന് ഇയാളെ കസ്റ്റഡിയിലെടുത്ത് ചോദ്യംചെയ്തതോടെ കുറ്റം സമ്മതിക്കുകയായിരുന്നു.
