കേന്ദ്ര ഗതാഗത വകുപ്പ് മന്ത്രി നിതിന്‍ ഗഡ്കരിയുടെ ജീവിതം സിനിമയാകുന്നു. ഗഡ്കരിയുടെ വ്യക്തി ജീവിതവുമായും ഔദ്യോഗിക ജീവിതവുമായും തീരുമാനങ്ങളുമായും അടുത്ത് നില്‍ക്കുന്ന ചിത്രമായിരിക്കും ‘ഗഡ്കരി’. ഒക്ടോബര്‍ 27ന് ചിത്രം റിലീസ് ചെയ്യുമെന്ന് സംവിധായകന്‍ അനുരാഗ് രാജന്‍ ബുസാരി അറിയിച്ചു. ചിത്രത്തിന്റെ ടീസര്‍ അടുത്തിടെ പുറത്തു വിട്ടിരുന്നു.
‘ഈ രാജ്യം അതിന്റെ റോഡുകളുടെ പേരിലറിയപ്പെടുന്ന സമയം, ഞാനാണ് നിതിന്‍ ജയറാം ഗഡ്കരി എന്ന് സന്തോഷത്തോടെ പറയാനാകും,’ എന്ന വാചകത്തോടെയാണ് ചിത്രത്തിന്റെ ടീസര്‍ ആരംഭിക്കുന്നത്. ചിത്രത്തില്‍ നിതിന്‍ ഗഡ്കരിയുടെ വേഷത്തില്‍ ആരാണ് എത്തുന്നതെന്നും ഇതുവരെ പുറത്തു വിട്ടിട്ടില്ല. ചിത്രത്തെ കുറിച്ച് കൂടുതല്‍ വിവരങ്ങള്‍ പുറത്തു വിട്ടിട്ടില്ല.
‘പോസ്റ്റര്‍ റിലീസിന് ശേഷം നിരവധി പേരാണ് എന്നെ ഫോണില്‍ വിളിച്ചത്. ആരാണ് നിതിന്‍ ഗഡ്കരിയുടെ വേഷം ചെയ്യുന്നത് എന്ന് പലരും എന്നോട് ചോദിച്ചു. ഈ ആകാംഷ ഉടനെ അവസാനിക്കും. ഒരു സാധാരണ സാമൂഹിക പ്രവര്‍ത്തകനില്‍ നിന്ന് കേന്ദ്രമന്ത്രി പദവിയിലേക്ക് എത്തിയ അദ്ദേഹത്തിന്റെ ജീവിതം പ്രചോദനം നല്‍കുന്നു. അദ്ദേഹത്തിന്റെ വ്യക്തി ജീവിതവും എല്ലാവര്‍ക്കും പ്രചോദനം നല്‍കുമെന്നാണ് കരുതുന്നത്,’ അനുരാഗ് രാജന്‍ ബുസാരി പറഞ്ഞു.
