ജീവനക്കാരിയുടെ ചിത്രങ്ങൾ മോർഫ് ചെയ്ത് പ്രചരിപ്പിച്ചു; വനിതാ ഫോറസ്റ്റ് സൂപ്രണ്ടിന് സസ്‌പെൻഷൻ

പാലക്കാട്: സഹപ്രവർത്തകയുടെ ചിത്രമെടുത്ത് അശ്ലീലമായി സമൂഹമാദ്ധ്യമങ്ങളിലൂടെ പ്രചരിപ്പിച്ച സംഭവത്തിൽ ചാലക്കുടി ഫോറസ്റ്റ് ഡിവിഷൻ ഓഫീസിലെ വനിതാ സീനിയർ സൂപ്രണ്ടിന് സസ്‌പെൻഷൻ. സീനിയർ സൂപ്രണ്ട് ഹോബി ഡിവിഷൻ ഓഫീസിലെ വനിതാ സീനിയർ ഹോബി ഹരിയെയാണ് സസ്‌പെൻഡ് ചെയ്തത്. മേലധികാരി തന്റെ അധികാരം ദുർവിനിയോഗം ചെയ്ത് സഹപ്രവർത്തകരെ പീഡിപ്പിച്ചെന്ന് ആരോപിച്ച് സഹപ്രവർത്തകരാണ് ഇവർക്കെതിരെ പരാതി നൽകിയത്.

ചാലക്കുടി ഡിവിഷണൽ ഫോറസ്റ്റ് ഓഫീസിൽ ഇരുപതോളം വനിതാ ജീവനക്കാരാണ് ഉള്ളത്. വനിതാ ജീവനക്കാരും സൂപ്രണ്ടും തമ്മിൽ നാളുകളായി സ്വർച്ചേർച്ചയിൽ അല്ലായിരുന്നുവെന്നും പറയുന്നു. ഡിവിഷൻ ഓഫീസിലെ ജീവനക്കാരിയുടെ ചിത്രങ്ങൾ മോർഫ് ചെയ്ത് അശ്ലീല ചിത്രങ്ങളാക്കി സമൂഹമാദ്ധ്യമങ്ങൾ മുഖേന പ്രചരിപ്പിച്ചുവെന്നാണ് പരാതിയിൽ പറയുന്നത്. പരാതിക്കാരിയായ ജീവനക്കാരിയെ ശാരീരികമായി അധിക്ഷേപിച്ചുവെന്നും പറയുന്നു.

അന്വേഷണത്തിൽ പരാതിയിൽ വാസ്തവമുണ്ടെന്ന് തെളിഞ്ഞതോടെ സൂപ്രണ്ടിനെ സസ്‌പെൻഡ് ചെയ്യുകയായിരുന്നു. മോർഫിംഗുമായി ബന്ധപ്പെട്ട് ഉദ്യോഗസ്ഥയ്‌ക്ക് ഖേദമില്ല, സഹപ്രവർത്തകരോട് സഹകരണമില്ലാതെ സ്ഥിരമായി വാക്കു തർക്കത്തിൽ ഏർപ്പെടുന്നു, ഫയലുകളുടെ നടപടി വൈകിപ്പിക്കുന്നു, എല്ലാ ജീവനക്കാരും ഇവർക്കെതിരെ പരാതി നൽകി എന്നീ കാര്യങ്ങൾ മുൻ നിർത്തിയാണ് നടപടി സ്വീകരിച്ചിരിക്കുന്നത്.