നെല്ല് സംഭരണത്തിൽ സംസ്ഥാനത്തിന്റേത് രാഷ്‌ട്രീയക്കളി സഹകരണ അഴിമതിക്കാരെ സംസ്ഥാന സർക്കാർ സംരക്ഷിക്കുന്നു: ശോഭ ശോഭ കരന്ദലജെ

തിരുവനന്തപുരം: സഹകരണ ബാങ്കുകളിലെ തട്ടിപ്പുകാരെ സംരക്ഷിക്കുന്നത് സംസ്ഥാന സർക്കാരാണെന്ന് കേന്ദ്ര കൃഷി സഹ മന്ത്രി ശോഭാ കരന്തലജെ. നെല്ല് സംഭരണത്തിൽ സംസ്ഥാന സർക്കാർ രാഷ്‌ട്രീയം കളിക്കുകയാണ്. കാർഷിക മേഖലയിലെ അടിസ്ഥാന സൗകര്യ വികസനത്തിന് കൃഷി വികാസ് യോജന വഴി ഫണ്ട് ഉണ്ട്. കോൾഡ് സ്റ്റോറേജ്, ടെസ്റ്റിംഗ് ലാബുകൾ അടക്കം നിർമ്മിക്കാൻ ഫണ്ട് ലഭിക്കും. അതിന് പ്രോജക്ട് റിപ്പോർട്ട് നൽകിയാൽ മതിയാകും. കേരളം ഇതുവരെ ഒരു പ്രോജക്ട് റിപ്പോർട്ട് പോലും തയ്യാറാക്കുകയോ സമർപ്പിക്കുകയോ ചെയ്തിട്ടില്ലെന്നും മന്ത്രി ആരോപിച്ചു. തിരുവനന്തപുരത്ത് മാധ്യമ പ്രവർത്തകരോട് സംസാരിക്കുകയായിരുന്നു മന്ത്രി.

15 സഹകരണ ബാങ്കുകളിലായി ആയിരക്കണക്കിന് കോടി രൂപയുടെ തട്ടിപ്പാണ് പുറത്തുവരുന്നത്. സഹകരണ സംഘത്തിലെ അഴിമതിയിൽ സിപിഎമ്മിനെ കോൺഗ്രസ്സും ലീഗിനെയും കോൺഗ്രസ്സിനെയും സിപിഎമ്മും പരസ്പരം സഹായിക്കുകയാണ്. തട്ടിപ്പ് നടത്തിയ എംഎൽഎയെയും നേതാക്കളെയുമെല്ലാം സർക്കാർ സംരക്ഷിക്കുകയാണ്. സഹകരണ സ്ഥാപനത്തിലെ പണം രാഷ്‌ട്രീയക്കാർക്കും അവരുടെ ബന്ധുക്കൾക്കും സ്വകാര്യ വ്യക്തികൾക്കും ധൂർത്തിന് നൽകി. ജനങ്ങളെ സർക്കാർ വഞ്ചിക്കുകയാണ്. നിക്ഷേപകരുടെ പണത്തിനും ജീവൻ നഷ്ടമായതിനും ആര് ഉത്തരവാദിത്തം പറയും. സ്വർണവും വസ്തുക്കളുടെ പ്രമാണങ്ങളും നിക്ഷേപങ്ങളും ദുരുപയോഗം ചെയ്തു. ജനങ്ങളുടെ പണവും സ്വർണവും തിരികെ ലഭിക്കണം. കേരള സർക്കാർ സഹകരണ അഴിമതിക്കെതിരെ നടപടി എടുക്കാനും ജനങ്ങളോട് മറുപടി പറയാനും തയ്യാറാകണം. അന്വേഷണത്തിൽ ഇഡിയുമായി സർക്കാർ സഹകരിക്കണമെന്നും സുരേഷ് ഗോപി പദയാത്ര നടത്തിയപ്പോൾ കോൺഗ്രസ്സ് ഉൾപ്പെടെ എല്ലാവരും മൗനത്തിലാണെന്നും മന്ത്രി പറഞ്ഞു.

കർഷകരിൽ നിന്നും ഏറ്റെടുത്ത നെല്ലിന്റെ കണക്ക് നൽകുന്നതിന് അനുസരിച്ച് കേരളത്തിന് പണം നൽകിയിട്ടുണ്ടെന്നും മന്ത്രി കൂട്ടിച്ചേർത്തു. കണക്ക് നൽകിയ എല്ലാ സംസ്ഥാനങ്ങൾക്കും പണം നനൽകിയിട്ടുണ്ട്. ഇക്കാര്യത്തിൽ കേരളം രാഷ്‌ട്രീയം കളിക്കുകയാണ്. എത്ര നെല്ല് സംഭരിച്ചു, അതിൽ എത്ര വിതരണം ചെയ്തു എന്ന് കണക്ക് നൽകിയാൽ ആ പണം കേന്ദ്രം നൽകും. കേരളം കണക്കുകൾ നൽകുന്നില്ല. ഇതോടെ ദുരിതത്തിലായത് കർഷകരാണ്. കൃഷിയുടെ കാര്യത്തിൽ മാത്രമല്ല എല്ലാ കേന്ദ്ര പദ്ധതികളോടും സംസ്ഥാനത്തിന് വിമുഖതയാണ്.
മേദിസർക്കാരിന് വികസന കാര്യത്തിൽ രാഷ്‌ട്രീയ വിവേചനമില്ല. എല്ലാ സംസ്ഥാനങ്ങൾക്കും വികസന പരിഗണന നൽകിയാണ് രാജ്യത്തെ ശക്തിപ്പെടുത്തുന്നത്. വന്ദേഭാരത്, റയിൽവേ സ്റ്റേഷനുകളടെ വികസനം, റോഡുകൾ തുടങ്ങി നിരവധി വികസന പദ്ധതികൾ കേരളത്തിന് നൽകി. എന്നാൽ കേരളം കേന്ദ്രസർക്കാർ പദ്ധതികളോട് സഹകരിക്കുന്നില്ല. ഒന്നുകിൽ പദ്ധതി നടപ്പിലാക്കില്ല, അല്ലെങ്കിൽ പേര് മാറ്റി നടപ്പിലാക്കും. പ്രധാൻമന്ത്രി ആവാസ് യോജന, ജൽ ജീവൻ മിഷൻ, തുടങ്ങി നിരവധി ഉദാഹരണങ്ങൾ ഇതിനുണ്ടെന്നും മന്ത്രി പറഞ്ഞു.

വാർത്താസമ്മേളനത്തിൽ സംസ്ഥാന ജനറൽസെക്രട്ടറി പി.സുധീർ, സംസ്ഥാന സെക്രട്ടറി എസ്.സുരേഷ്, ജില്ലാ പ്രസിഡൻ്റ് വിവി രാജേഷ് എന്നിവർ സംബന്ധിച്ചു.