കൊച്ചി: കരുവന്നൂരിലെ കള്ളപ്പണ ഇടപാടുമായി ബന്ധപ്പെട്ട് അറസ്റ്റിലായ പിആര് അരവിന്ദാക്ഷനേയും ജിന്സിനേയും അടിയന്തരമായി എറണാകുളം സബ് ജയിലിലേക്ക് തിരികെ എത്തിക്കാന് ഉത്തരവ്. കള്ളപ്പണ ഇടപാടിലെ മുഖ്യപ്രതി സതീഷ്കുമാര് റിമാന്ഡിലുള്ള ജില്ലാ ജയിലിലേക്ക് പിആര് അരവിന്ദാക്ഷനെ മാറ്റിയത് അന്വേഷണം അട്ടിമറിക്കാനാണെന്ന് ഇഡി ആരോപിച്ചിരുന്നു. പിന്നാലെ ജയില് മാറ്റണമെന്ന ഇഡിയുടെ ആവശ്യം എറണാകുളം പിഎംഎല്എ കോടതി അംഗീകരിക്കുകയായിരുന്നു.
കരുവന്നൂരിലെ കള്ളപ്പണ ഇടപാടിലെ മുഖ്യപ്രതി സതീഷ്കുമാര് റിമാന്ഡിലുള്ള ജില്ലാ ജയിലിലേക്ക് പിആര് അരവിന്ദാക്ഷനെ മാറ്റിയ ജയില് സൂപ്രണ്ടിനെതിരേ ഇഡി പ്രത്യേക കോടതിയില് റിപ്പോര്ട്ട് ഫയല് ചെയ്തിരുന്നു. സതീഷ്കുമാറിനും അരവിന്ദാക്ഷനും നേരില് കാണാന് അവസരമൊരുക്കിയത് അന്വേഷണം അട്ടിമറിക്കാനാണെന്നും ഇഡി ആരോപിക്കുന്നു.
തടവുകാരുടെ ബാഹുല്യം മൂലമാണ് ഇവരെ മാറ്റിയതെന്നാണ് ജയില് സൂപ്രണ്ടിന്റെ വിശദീകരണം. എന്നാല് അരവിന്ദാക്ഷനേയും ജിന്സിനേയും മാത്രമാണ് ജയില്മാറ്റിയത്. 60 തടവുകാരെ പാര്പ്പിക്കാവുന്ന ജയിലില് 110 തടവുകാരുണ്ടായിട്ടും ഒരു നടപടിയും ഉണ്ടായിട്ടുണ്ടായിരുന്നില്ല. കോടതിയേയോ ഇഡിയെയോ അറിയിക്കാതെയാണ് കഴിഞ്ഞ 29-ന് ജയില് വകുപ്പ് പ്രതികളുടെ ജയില്മാറ്റം നടത്തിയത്. അരവിന്ദാക്ഷനെ വീണ്ടും ഇഡി ചോദ്യം ചെയ്യാനിരിക്കുകയാണ്.
