ഇടുക്കി: ഇനിയും ജലനിരപ്പുയരാതെ ഇടുക്കി അണക്കെട്ട്. 2,343 അടി വെള്ളം മാത്രമാണ് അണക്കെട്ടിൽ ഉള്ളത്. സംഭരണശേഷിയുടെ 40 ശതമാനം മാത്രമാണ് ഇത്. കഴിഞ്ഞ വർഷം 2,386 അടി വെള്ളമാണ് ഇതേസമയം അണക്കെട്ടിൽ ബാക്കിയുണ്ടായിരുന്നത്. ഇനിയും ജലനിരപ്പ് ഉയരാത്തതിനാൽ തന്നെ കെഎസ്ഇബിയ്ക്ക് ആശങ്ക വർദ്ധിക്കുകയാണ്.
839 മീറ്റർ ഉയരമുള്ള കുറവൻമലയെയും 925 മീറ്റർ ഉയരമുള്ള കുറത്തിമലയെയും കൂട്ടിയിണക്കി 555 അടി ഉയരത്തിലായി പെരിയാറിനു കുറുകെയാണ് ഇടുക്കി അണക്കെട്ടിന്റെ നിർമ്മാണം. 60 ചതുരശ്രകിലോമീറ്റർ വ്യാപിച്ചുകിടക്കുന്ന ജലസംഭരണിയാണ് ഡാമിനുള്ളത്. പരമാവധി സംഭരണശേഷി 74.5 ദശലക്ഷം ഘനയടിയാണെങ്കിലും 70.5 ടിഎംസിവരെയാണ് സംഭരിക്കാറുള്ളത്.
