ന്യൂദല്‍ഹി: പാകിസ്താന് രഹസ്യാന്വേഷണ ഏജന്‍സിയായ ഐഎസ്‌ഐക്ക് വേണ്ടി ചാരപ്പണി നടത്തിയതിന് യുവാവിനെ പിടികൂടി. ഉത്തര്‍പ്രദേശിലെ തീവ്രവാദ വിരുദ്ധ സ്ക്വാഡാണ് ഇയാളെ അറസ്റ്റ് ചെയ്തത്.
കാസ്ഗഞ്ച് പട്യാലി നിവാസിയായ ശൈലേന്ദ്ര സിങ് ചൗഹാന്‍ എന്ന ശൈലേഷ് കുമാര്‍ സിങ് ആണ് പിടിയിലായത്. ചോദ്യം ചെയ്യലിനായി ലഖ്നൗവിലുള്ള തീവ്രവാദ വിരുദ്ധ സ്ക്വാഡിന്റെ . ആസ്ഥാനത്തേക്ക് വിളിച്ചുവരുത്തിയ ശേഷമായിരുന്നു അറസ്റ്റ് ചെയ്തതെന്ന് ഡിജിപി പ്രശാന്ത് കുമാര്‍ പറഞ്ഞു.ഇന്ത്യന്‍
സൈന്യത്തിന് വേണ്ടി അരുണാചല്‍ പ്രദേശില്‍ കഴിഞ്ഞ ഒമ്പത് മാസത്തോളം താല്‍ക്കാലിക അടിസ്ഥാനത്തില്‍ പോര്‍ട്ടറായി ജോലി ചെയ്തുവരികയായിരുന്നു ശൈലേന്ദ്ര ചൗഹാന്‍. സൈനിക വാഹനങ്ങളുടെ പോക്കുവരവും ലൊക്കേഷനും അടക്കമുള്ള വിവരങ്ങളും ഫോട്ടോകളും ഇയാള്‍ ഐഎസ്‌ഐ ബന്ധമുള്ളവര്‍ക്ക് അയച്ചുകൊടുത്തെന്നാണ് ആരോപണം. ഒരു ഫോട്ടോക്ക് ഏകദേശം 2000 രൂപ വീതം ഇയാള്‍ കൈപ്പറ്റിയെന്നും തീവ്രവാദവിരുദ്ധ സ്ക്വാഡ് പ്രസ്താവനയില്‍ പറഞ്ഞു. പ്രീതിയെന്ന ഐ.എസ്.ഐ ഏജന്‍റിനാണ് ഇയാള്‍ സൈന്യത്തിന്റെ ഫോട്ടോ കൈമാറിയതെന്നും ബന്ധപ്പെട്ടവര്‍ വ്യക്തമാക്കി.ഹര്‍ലീന്‍ കൗര്‍ എന്നയാളാണ് ഐഎസ് ഐയെ പരിചയപ്പെടുത്തിയതെന്ന് പറയുന്നു.
ശൈലേഷ് ചൗഹാന്‍ എന്ന പേരിലുള്ള ഫേസ്ബുക്ക് അക്കൗണ്ടിലൂടെയാണ് ഇയാള്‍ വിവരങ്ങള്‍ കൈമാറിയത്. ഇന്ത്യന്‍ ശിക്ഷാനിയമം 121 (എ), 171, ഐടി വകുപ്പ് 66 എന്നി പ്രകാരമാണ് കേസെടുത്തത്.
പ്രതികരിക്കാൻ ഇവിടെ എഴുതുക: